बुद्ध अनुयायी उच्चवर्गय् सामन्ती अवशेष

लाभरत्न तुलाधर

नेपाःया बुद्धधर्मया विशेषता छु:
अथे हे सुइदँ ति दत जुइ। दँपौ 'न्हसला' (सामाजिक पुनर्निर्माणया पौ) यागु अन्तर्वार्ता विशेषांककथं सम्पादन यानागु। उकी नांजाःपिं चिन्तक विचारक व सुधारकपिंत मंकाः न्ह्यसः न्यनागु मध्येय् छगू खः 'नेपाःया बुद्धधर्मयात सही दिशापाखेर न्ह्यज्याकेत छु छु ज्या यायेमाली?'
तःम्ह हे च्वमिपिंसं थःथःगु माथं लिसः बिल। उकी नं लुमंके बहगु लिसः योगाचार्य विकासानन्दया सार थथे - "थुज्वःगु न्ह्यसः धइगु हे बौद्धधर्मया नामय् सम्प्रदायस सीमित जूगुया संकेत खः। अथे हे विहार जक धायेबलय् बौद्धविहार धालकि साम्प्रदायिक गन्ध ह्वास्स नवइ।" योगाचार्यया निष्कर्ष दु कि थौंयागु युगयात साम्प्रदायिक मखु, सकल प्राणीयात कय्च्याये फुगु धर्म माःगु दु। अले मानव मात्रया सर्वतोमुखी विकासया निम्ति क्रियाशील जुइपिं अध्यात्मिक धार्मिक जन समुदाय माःगु दु। थुपिं जुल २०-२३ दँ न्ह्यः हे छम्ह युवा चिन्तक व योगगुरुया उद्गार ।

गुरु बज्राचार्य वर्गया समस्या:
थ्वहे स्वनिगलय् वंगु १०-१५ दँ थुखे दर्जनौं थज्याःगु संघसंस्थाया रुपय् पिलूवःगु दु गुकिया उद्देश्य धइगु छगू निश्चित वर्ग, जाति वा सम्प्रदायया निंतिं जक छुं याइगु स्पष्ट जू - इमिगु नामं हे। गथे - नेपाल परम्परागत बौद्ध धर्म संघ, नेपाःया बौद्ध धर्म संघ, त्रिरत्न कोष, दे आचार्य गुथि, वज्राचार्य संरक्षण गुथि आदि। अथे हे अखिल नेपाल शाक्य समाज, दि शाक्य फाउण्डेशन। अन्तर्जातीय धर्मपत्नीपाखें दुपिं कुलपुत्रपिंत थःपिनि कुलपरम्पराकथं प्रव्रजित यायेगु ज्या थुपिं संस्थातय्त तःधंगु हाथ्या कथं न्ह्यःने वयाच्वन। थुज्वःगु हे निब्व स्वब्व (दुविधा)यात शमन यायेकथं वंगु मंसीरं यलया पूचय् जूगु सकल नेवाः वर्गया प्रतिनिधि दुथ्याःगु तःमुँज्या थिति मल्लया जात बन्देजयात सिद्धान्तया ल्याखं खारेज यानागु जुल धकाः घोषणा याःगु जुइमाः। थुकियात व्यवहारय् रुपान्तरण यायेगु ज्या च्वय् न्ह्यथनागु संघसंस्थायागु ब्वहलय् लाःवःगु जुल। परन्तु, सदियौंनिसें मांया प्वाथं पिहां वयेव हे गुर्जु बिज्याहुँ धकाः बोनस सम्मान कया वयाच्वंपिं थ्व वर्गया समाजं नेवाः समाज व ईया आह्वानयात गन तक नुगलय् थाय् बीगु खइ, वइगु इलं हे जक क्यनी ।

शाक्य कुल धाक्व वन्द्य जुइला:
भगवान बुद्धया मेगु नां शाक्यमुनि। समग्र शाक्यवंशया इतिहासय् हे मदुकथं महान् त्याग तपस्या, बोधिप्राप्ती व चारिका यायेत समर्थ जूगुलिं हे 'मुनि' प्रत्ययं सम्मानित याःगु खयेमाः। वास्तविकय् शाक्यवंश धइपिं परम्परा ल्याखं क्षेत्रीय व वैदिक सनातन धर्मया अनुयायी। तर सिद्धार्थ बुद्ध जुसेंलि सम्पूर्ण शाक्य जात हे बौद्ध थें जुल। न्ह्यसः खः वर्तमान शाक्य समाज वा संघं शाक्यमुनिया मार्गदर्शनकथं गुलि प्रतिशत व्यवहार न्ह्याकाच्वंगु दु? नेपाःया खँ ल्हायेसा, सलय् गुइम्हेस्यां ज्यासः ज्या अर्थात लुँ, वहःया तिसा, मूर्ति आदिया कारिगर, शिल्पी जुयाः लजगाः यानाच्वंगु खनेदु। अले बुद्धया वंशज जूगुलिं हे स्वयं वन्द्य घोषित थ्व जाति कालान्तरय् बन्दे-बदे-बरेजु कथं ज्यलावंगु प्रस्ट जू। थुगु अवस्थाय् कुल वंश परम्परा कथं नं थुगु जातयापिं मनूत मेपिं सिबें आपाः प्रव्रजित जुइगु स्वाभाविक जुल ।

चीवरधारीपिंत सुझाव:
गृहस्थपिं शाक्य-वज्राचार्यपिंके सांसारिक व लौकिक दायित्व नं उलिं तुं दयाच्वनीगु कारणं छगू वा मेगु सम्यक आजीविका याना हे च्वने मानिगु ध्वाथुइके अःपु। परन्तु गृह जंजालया बन्धन त्याग यानाः थः व कतःया जीवन समुन्नत व निक्लेश यायेगु महान् संकल्प यानाः विहार एकान्तबासी जुयाच्वंपिं सलंसः चीवरधारी पुचलय् नं सही अर्थय् स्तुत्य व अनुकरणीय चर्या यानाबिज्यापिं सांगाय् ससि माले थें थाकुया वल। झीगु समाज, देश व सद्धर्मया लागिं थ्व परिपाटी तछ्याइपिनि प्रतिक्षा दु ।

More Stories Like this