एसएलसीइ नेपालभाषा विषययात लापरवाही
थौंकन्हय् सञ्चालन जुयाच्वंगु एसएलसीइ म्हिगः जूगु नेपालभाषा विषयया परिक्षाय् परिक्षा नियन्त्रण कार्यालयं तसकं हे लापरवाही याःगु दु । प.नि.कां म्हिगःया नेपालभाषा परिक्षाय् झिदँ न्ह्यःया पाठ्य क्रमया न्ह्यसःपौ वितरणयाःगु खः ।
प्राप्त जानकारी कथं म्हिगः वितरण जूगु न्ह्यसः पतिइ दुगु न्ह्यसः मध्यय् व्याकरण खण्डया छुं अपवाद त्वःताः शत प्रतिशत हे न्ह्यसः पुलांगु पाठ्यक्रमया जक जूगु व उकिइ दुगु छुं नं पाठ्यांश न्हूगु पाठ्यक्रमय् मदुगु धाःगु दु । थुगु खँ सिइवं म्हिगः पनिकाय् स्वापू तयेगु यक्व कुतः लिपा प्रमुख परिक्षा नियन्त्रकयात स्वापू जूगु तर वय्कःयात थुगु खँया जानकारी बिइवं न्ह्याम्हसां नेपालभाषा शिक्षकयात स्वापू तयाः अन हे प्रश्नपत्र दयेकाः जाँच बिइकि धकाः गैर जिम्मेवारीपूर्ण निर्देशन ब्यूगु खँ नेपाल आदर्श माविया नेपालभाषा शिक्षक भूषणप्रसाद श्रेष्ठं नेपालमण्डल यात जानकारी बियादिल ।
श्रेष्ठया हे कुतलं लिपा न्हूगु पाठ्यक्रम अनुसारया २०६२ सालया न्ह्यसःपतिइ साल त्वःपुयाः फोटोकपि यानाः येँया प्यंगू परिक्षा केन्द्रय् नेपालभाषा परिक्षा कायेगु ज्या क्वचाःगु खः । मेखे सक्वय् धाःसा तसकं अनभिज्ञ कथंया न्ह्यसः वयेवं विद्यार्थीतय्सं थम्हं सःसःथे परिक्षा बियावःगु सिइदत ।
स्वनिगःया मेमेगु परिक्षा केन्द्रय् परिक्षा गथे जुल धयागु खँय् सम्वन्धित मनूतय्त नाप लायेगु कुतः जुयाच्वंगु दु । अपडेटया लागि नेपालमण्डल डट कम स्वया च्वनादिसँ ।
Related Stories
नेपालभाषा कयाः एसएलसी ब्यूपिं शत प्रतिशत उतिर्ण थुगुसीया एसएलसीMore Stories Like this
खुम्ह ब्वमिपिन्त छात्रवृति लःल्हात एसएलसी दसि पौ प्रमाणीकरण इन्टरनेटं शिक्षक नियुक्तिया लँपु चाल लक्ष्मीनारायण-पुनमाया सिरपाः लःल्हात एसएलसीइ नेपालभाषा कयाः ब्वंपिंत हन
