मन्त्री दयेकेत करोडौं 'लगानी'

सचिवया 'राजीनामां' अर्थमन्त्रीया आगं प्वल

येँ (सन्ध्या टाइम्स)/अर्थ सचिव रामेश्वर खनालं आक्रोशित जुयाः मन्त्रालय त्वःता वनेवं वय्कलं छाय् अथे ज्या त्वःता वन जुइ धकाः शुरु जूगु मालेगु ज्यां अर्थमन्त्री भरतमोहन अधिकारी व हाकुबजाः याइपिं व्यापारीतय् दथुया स्वापू सार्वजनिक जूगु दु ।

विज्ञ सूत्रतय्सं बिउगु जानकारी कथं भाजु भरतमोहन अधिकारीयात अर्थमन्त्री दयेकेगु लागिं आपालं मारवाडी व्यापारीत जानाः एमालेयात करिब १० करोड दां बुझे याःगु जुयाच्वन। उलि दां वइगु जूगुलिं एमालें चुनावय् बूपिंत मन्त्री दयेके मखु धाःसां नं भरत मोहन अधिकारीयात अर्थमन्त्री दयेकूगु खः। मारवाडी व्यापारीतय्सं वय्कःयात अर्थमन्त्री दयेकेत उलि दां 'लगानी' याःगु हे नकली भ्याटबील दयेकूपिंत कारवाही यायेगु धकाः जुयाच्वंगु तयारी दिके बीत खः। भरत मोहनया लागिं एमालेयात बिउगु १० करोडय् शंकर समूहया अध्यक्ष शंकर लाल गोल्यान, बैंक अफ एशियाया अध्यक्ष त्रिलोकचन्द्र अग्रवालया दां नं लानाच्वंगु दु। उकी दथुइ मध्यस्थकर्ता जुयाः ज्या याना बिउम्ह चाहिं एमालेया हे सभासद् विनोद चौधरी जुयाच्वन। सरकारं शंकर ग्रुपपाखें ३० करोड, चौधरीया किजा अरुण चौधरीपाखें नं करोडौं कर म्हयेमानिगु ल्याःचाः पिकयातःगु दु। यदि थ्व व्यापारीतय्त कारवाही यायेमाःगु अवस्था वल धाःसा अर्थमन्त्री अधिकारीयात तसकं थाकुगु अवस्था वइगु खँ धाःगु दु। मन्त्री अधिकारीं खनालयात ज्याय् लित सःतादीगु दु ।

अर्थ सचिवं मन्त्रालय त्वःतेवं ...
o अर्थ मन्त्रालयया कर्मचारीपाखें हडताल।
o लेखा समितिपाखें अर्थमन्त्री भरतमोहन अधिकारीयात सःताः बयान।
o एमालेया विशेष बैठक सःताः घटना बारे चर्चा।
o विपक्षी कांग्रेसपाखें संसद बैठक अवरुद्ध।
o मन्त्रिपरिषद्या बैठकय् विशेष चर्चा।
o भंसार कर्मचारीपाखें विराटनगर भंसार बन्द, करोडौं द्यापं ।