अर्थ सचिवं कुर्सी त्वःतेवं पिदंगु तरंग

प्रशासनिक ख्यलय् कुशल व इमान्दार धकाः नांजाःम्ह अर्थ सचिव रामेश्वर खनालं अर्थमन्त्रीया दवाव फये मफयेमाः मन्त्रालय त्वःतादीगु घटनां देय्या प्रशासन जक मखु राजनीतिइ तकं मेगु कथंया तरंग हया बिउगु दु। स्वच्छ छबी दुम्ह प्रशासक सुगतरत्न कंसाकारयात याःगु पूर्वाग्रही कारवाही लिपा आः अर्थ सचिव खनालयात वःगु थ्व दवावं देशयात राजनीतिक पार्टी व उकिया नेतातय्सं थःपिनि व्यक्तिगत सम्पत्ति हे तायेकूगु खः लाकि धकाः शंका यायेमाःगु अवस्था हया बिउगु दु ।

सचिव खनाल देशय् नकली भ्याट बील दयेकाः राजश्व छले याःपिं हाकु बन्जाःतय्त कारवाही यायेमाः धइगु पक्षयाम्ह खः। तर अर्थमन्त्री भरतमोहन अधिकारीं व्यापारीतय् दवावं यानाः वय्कःयात उगु ज्या याके मबिउगु कारणं निम्हेसिया दथुइ तनाव ब्वलनाच्वंगु खः। तर अन्तिमय् बांलाःगु पक्षय् अडान काःम्ह सचिवं बाध्य जुयाः कुर्सी त्वःता वंगुलिं राजनीतिक दल व उकिया नेता जुयाच्वंपिं मन्त्रीतय्सं शासन सत्तायात गुकथं हाकुबन्जाःतय् हितय् दुरुपयोग यानाच्वन धइगु खँ खुलस्त याना बिउगु दु। अर्थ सचिव खनालया थ्व प्रकरणं माओवादी व एमाले जानाः गठन जूगु थ्व सरकारय् समेत संकट हया बीगु सम्भावना दु। छाय्धाःसां सचिव खनाल न्हापा माओवादी सरकारय् नं सचिव हे जुयाः ज्या यासें माओवादीयात गाक्कं ग्वाहालि याःम्ह खः। उकिं वय्कःया इमान्दारिता माओवादीं बांलाक हे सिउ। अज्याःम्ह मनूयात यदि एमालें लिकायेगु धाल धाःसा उकिं सरकारयात संकटय् लाकीगु निश्चित दु। सरकारं इमान्दार राष्ट्रसेवकयात संरक्षण यायेगु पलाः ल्ह्वेनमाः ।

More Stories Like this