मन्त्री-सचिव ल्वापुया मेगु दसु

हाकुबन्जाःतय् दवावं अर्थसचिवं मन्त्रालय त्वःतल

येँ (सन्ध्या टाइम्स)/ अर्थ मन्त्रालयया सचिव रामेश्वर खनाल म्हिगः आकाझाकां मन्त्रालय त्वःताः पिहां वना बीवं देय्या प्रशासन व राजनीतिक ख्यलय् तःधंगु चर्चा जूगु दुसा उकिया नापनापं सचिव खनालं छाय् अथे ज्याकू हे त्वःता वनेमाल धइगु कारण मालेगु नं शुरु जूगु दु ।

म्हिगः न्हिनय् आकाझाकां 'थनिंनिसें जि मन्त्रालय वये मखुत' धकाः सरासर न्यासि हे वयाः पिहां वःम्ह भाजु खनाल सुयां नं सम्पर्कय् वःगु मदुनि । तर विज्ञ सूत्रतय्सं बिउगु जानकारी कथं भाजु खनालं मन्त्रालय त्वःता वःगु स्वयां नं वय्कःयात पद त्वःतेत बाध्य याकूगु खनेदु ।

खास यानाः नक्कली भ्याट बील दयेकाः राजश्व छले यानाच्वंपिं व्यापारीतय्त कारवाही यायेमाः धकाः वय्कः तसकं लगे जुयादीगु खःसा अथे राजश्व छले याइपिं व्यापारीतय् दवावं हे वय्कःयात लिकायेगु ज्या जूगु दावी सूत्रया दु । नकली भ्याट बील दयेकाः राजश्व छले यायेगु ज्याय् अप्वः यानाः
मारवाडी व्यापारीत लानाच्वंगु दु ।

उकिं सचिव खनालयात पदं चीकेगु ज्याय् दकलय् न्ह्यःने च्वनाः ज्या यानाच्वंम्ह व्यापारी विनोद चौधरी खः धकाः नं सूत्रं धाःगु दु । एमालेया सभासद् नं जुयाच्वंम्ह व्यापारी विनोद चौधरीं एमाले-माओवादी सरकार गठन याके बियाः उकी भरतमोहन अधिकारीयात अर्थमन्त्री दयेकेगु लागिं तःधंगु हे पहल याःगु खः । भरतमोहन अधिकारी अर्थमन्त्री जुइसातकि विनोदं चौधरीं अर्थ सचिव पदं खनालयात चीकेत तःधंगु हे दवाव बिया वयाच्वंगु खँ सूत्रं धाःगु दु ।

भरतमोहन अधिकारी अर्थमन्त्री जुइधुंकाः अर्थ सचिव खनाल व मन्त्री दथुइ तःक्वः हे कचमच समेत जुइधुंकूगु खँ नं धाःगु दु । सचिव खनालं खास यानाः पूरक बजेट हयेगु खँय् व सहसचिवतय् सरुवा जूगु खँय् मन्त्रीया विरोध यानादीगु खः । अथे हे नकली भ्याट बीत दयेकीपिंत कारवाही यायेगु खँय् नं मन्त्रीलिसे वय्कःया खँ मिले मजूगु सीदुगु दु ।

भाजु खनालं म्हिगः आकाझाकां कुर्सी त्वःतादीगु खःसां थ्व वय्कःया राजीनामा खः वा मखु धइगु खँ धाःसा सी मदुनि । यदि अर्थ सचिव हे मंत धाःसा सरकारं हयेत्यंगु पूरक बजेट निर्माणय् नं समस्या पिहांवयेफु धाःगु दु । अर्थसचिव खनाल मन्त्रालयया तसकं इमान्दार व सःम्ह प्रशासक खः । वय्कलं दयेकीगु प्रपोजलयात दातृराष्ट्रतय्सं नं याउँक स्वीकार याना का: ।