माओवादी कार्यकर्ता थःथः ग्यानापुक ल्वापु

सांघातिक हमलाय् लाःपिं कार्यकर्ता अस्पताल भर्ना

येँ (सन्ध्या टाइम्स)/माओवादी मजदूर संगठन दुनेया ल्वापु आः थवंथवय् स्यायेगु पालेगु स्तरय् कुहां वःगु दु । मजदूर संगठन दुनेया ल्वापु बारे सहलह यायेगु धकाः म्हिगः अध्यक्ष प्रचण्डया छेँय् 'ज्यःनाः बैठक' जुयाच्वंगु इलय् उखे ख्वपय् धाःसा वहे नेतातय्त समर्थन याइपिं कार्यकर्तात धाःसा थवंथवय् खुकुरीं पालाः ल्वापु जुयाच्वंगु खः ।

ख्वपया सूर्यविनायकय् च्वंगु माओवादी मजदूर युनियनया ज्याकुथी मोहन वैद्यलिसे सतीपिं मजदूरतय्त प्रचण्डलिसे सतीपिं कार्यकर्तातय्सं बाम्ह सिक्क दाया थकूगु खः । उकी लानाः वैद्य पक्षया सुन्दर श्रेष्ठ, राज कुमार तिमिल्सिना व देवराज गुरुङ घाःपाः जूगु दु । बांमलाक घाःपाः जूम्ह सुन्दर श्रेष्ठया छ्यनय २२ टाँका तयातःगु दु ।

थ्व घटनायात जिल्ला कमिटीया दुजः लिसें यलया सभासद् राजकाजी महर्जनं घोर विरोध यासें घटनाय् ल्हाः दुपिं कार्यकर्तात सुनिल गोठ सानुकान्छा, श्याम ठोकर, सूर्य ब्लोन, उमा कपाली, भावना श्रेष्ठयात पार्टी सदस्यता हे मदइ कथं निष्काशन याना बिउगु दुसा थ्व आक्रमणया निर्देशन बिउपिं धकाः भाष्कर प्रधानांग लगायतयात कारवाहीया लागिं सिफारिस या:गु दु ।

भाषकर प्रधानांगया पुचलं धाःसा म्हिगः हे छगू पत्रकार सम्मेलन यासें घटनाय् थःगु ल्हाः मदु धाःगु दु । उखे यलया जिल्ला सेक्रेटरी दिपेशं म्हिगः पत्रकारत सःतुसें यलया सभासद् राजकाजी महर्जनं थःत सांघातिक आक्रमण याःगु धकाः द्वपं बिउगु दु । थुकिया बारे दिपेशं पार्टीइ उजुरी नं तःगु दु । दिपेशं म्हिगः सुथय् थः मर्निङ वाक् वनाच्वनागु इलय् सभासद महर्जन थः हे वयाः थःत आक्रमण याःगु खः धकाः द्वपं बिउगु दु । तर सभासद् महर्जनं धाःसा थम्हं आक्रमण यात धकाः वःगु द्वपं सरासर फय्गं खः धयादीगु दु । न्हापा पार्टीया पोलिटब्युरो दुजः हितमान शाक्यया सहयोगी जुयादीम्ह राजकाजी थौंकन्हय् वैद्य पक्षय् दी ।

उखे ख्वपय् वैद्य पक्षधर मजदूरतय्त आक्रमण याः वल धकाः सभासद् राजकाजीं कारवाहीया सिफारिस याःम्ह कार्यकर्ता भाष्कर प्रधानांग माओवादी त्वःता वंम्ह नेता रविन्द्रं श्रेष्ठ प्रभाकर प्रधानांगया किजा खः । कार्यकर्ताया थ्व ल्वापुं धाःसा पार्टीया नेतात हैरान जूगु दु । पार्टी सचिव सीपी गजुरेलं पार्टीया ल्वापु बांमलाक हे पिहां वःगु दु धासें आः थुकिया बारे गम्भीर रुपं हे छलफल यायेमाःगु खँ कनादीगु दु । थ्व नापं मेमेगु मुद्दायात कयाः थौं माओवादी स्थायी समितिया बैठक च्वनेत्यंगु दु । उपाध्यक्ष प्रकाशं नं ल्वापु गम्भीर विषय खः धयादीगु दु ।