तराईलय् जुयाच्वंगु गतिविधिया अर्थ छु?

आकाझाकां शुरु जुया वःगु मधेसवादी दलतय् सक्रियताया नापनापं तराई लागाय् बम विस्फोटया घटना नं अप्वया वःगु दु। वंगु वालंनिसें न्हिंन्हिं धइथें तराईया थीथी लागाय् न्ह्यानाच्वंगु गाडीइ तकं बम मुइकेगु ज्या जुयाच्वंगु दु। आः तक बागू दर्जन धइथें अज्याःगु घटना जुइधुंकूगु दुसा उकी लानाः आपालं मनूत घाःपाः जूगु दु। थज्याःगु श्रृंखलावद्ध घटनां यानाः तराई लागाय् हानं न्हापा थें हे आतंकपूर्ण हत्या हिंसाया ज्याझ्वः न्ह्याइगु जकं खः लाकि धकाः सर्वसाधारण जनता त्रसित जुयाच्वंगु दु ।

देशय् माओवादी व एमालेया उदारवादी खेमा जानाः सरकार गठन यायेवं भारत सक्रिय जुयाः सरकार विरुद्ध ज्याझ्वःत शुरु याना हःगु खः। थ्व झ्वलय् भारतं नेपाःया स्वंगू मधेसवादी दलया नेता लगायत न्हापांनिसें थः मनू धयातःम्ह सूर्यबहादुर थापायात समेत सःताः मन्त्र बियाहःगु ला झन सकस्यां प्रत्यक्ष हे खंगु खँ जुल। मधेसवादी दलतय्सं भारतय् याना वःगु उगु भेट लिपा हे तराई लागाय् थज्याःगु बम विस्फोटया घटना शुरु जुया वःगुलिं थुकिया लिउने गनं भारतया हे जकं ल्हाः दु लाकि धकाः शंका जुइगु स्वाभाविक खः। अथवा भारतया इशाराय् थ्वहे मधेसवादी दलतय्सं अज्याःगु ज्या यानाच्वंगु खः लाकि धकाः नं शंका जुइगु निश्चित खः। तराईलय् थज्याःगु घटना जुयाच्वंगुया कारण छु खः? घटना यानाच्वंपिनि माग छु खः? थ्व छुं माग हे तयाः जुयाच्वंगु ज्या खः लाकि देशय् आतंक मच्चे यायेत वा सरकार विफल यायेत जक जुयाच्वंगु ज्याखँ खः? थ्व खँ सीकाः उकिया निदान यायेमाःगु आवश्यक दु। तराईलय् जुयाच्वंगु थ्व गतिविधियात सामान्य रुपं कायेगु पाय्छि जुइ मखु ।

More Stories Like this