विस्फोटय् मधेसवादीत मौन
तराई लागाय् आतंकवादी गतिविधि शुरु याकूगु आशंका
येँ (सन्ध्या टाइम्स)/मधेस लागाय् थौंकन्हय् न्हियान्हिथं सार्वजनिक सवारी साधनय् जुयाच्वंगु बम विष्फोटया घटनाय् संविधानसभाय् दुथ्याःगु मधेसवादी दलत मौन च्वनाच्वंगुलिं अनेक शंका पिहां वयाच्वंगु दु ।
मधेसवादी दलतय्सं वर्तमान सरकारया विरोध यायेगु जक मखु माल धाःसा मधेसय् विद्रोह यायेगु धयाच्वंगु नापनापं भारतय् हे वनाः मधेसय् भूमिगत रुपं गतिविधि यानाच्वंगु दलया नेतातय्त नाप लानाः लिहां वःगु छुं ई लिपा हे अथे तराई लागाय् विष्फोटया घटनात निरन्तर रुपं जुयावःगु खनेदु। उलि जक मखु मधेसया मुद्दा संवोधन यायेमाः धकाः सरकारयात ख्याच्वः तकं बिया वयाच्वंगु मधेसवादी दलत थौं थःपिनिगु हे लागाय् निरन्तर बम विस्फोटया घटना जुयाच्वनं नं मौन जुयाच्वंगु खनाः मधेसी जनता अजू चायाच्वंगु दु ।
थुकिं यानाः मधेसय् जुयाच्वंगु थ्व गतिविधिया लिउने उमिगु हे ल्हाः दुगु जकं खः लाकि धकाः तकं अन अनुमान याना हःगु दु। अथवा थुकी पिनेयापिंसं ज्या यानाच्वंगु खँ सिउसां मधेसवादी दलत सुम्क च्वनाच्वंगु खः लाकि धकाः नं धयाहःगु दु ।
