आकार तःधंका यंकेगु एमालेया अभियान

चिचीधंगु वाम पार्टीतय्त छप्पँ यानाः तःधंगु पार्टी दयेकेगु अभियान एमालें न्ह्याकाच्वंगु खँ पिहांवःगुलिं एमाले समर्थक कार्यकर्तातय्त अवश्य नं लय्तायेकूगु दयेमाः। संविधानसभाय् दुथ्याःगु व थःगु मोडेलया बिचाःनाप मिले जूपिं वामपन्थी पार्टीतय्त छथाय् तयाः तःधंगु पार्टी दयेकेगु थ्व कुतः च्वछायेबहः नं जू। नेपाःया राजनीतिइ एमालें गुगु वामपन्थी धार ज्वंगु खः, थ्व धार जनताय् स्थापित जुइधुंकूगु दु। आःया इलय् वामपन्थयात एमालें थें सुधार यानाः न्ह्याकेगु लाकि माओवादीं थें परम्परागत रुपं न्ह्याकेगु धइगु निगू धार हे जक मुख्य खः। थ्व बाहेक मेगु धारया खास हे अर्थ मखु। उकिं थ्व निगू मू धारय् न्ह्यानाच्वंगु वामपन्थी पार्टीत थःथःगु अवधारणा कथंया वाम पार्टीइ एकीकृत जू व धाःसा उकिं थःगु धारयात अझ शक्तिशाली याना बीगु निश्चित दु। लिपांगु इलय् वयाः छगू ईया दिग्गज वाम नेतातय्सं नं तःधंगु छगू छगू पार्टीइ थःपिंत आवद्ध याना यंकूगुलिं नं सीदु, आःया चीधंगु वाम पार्टी नं न्हापा ला लिपा कन्हय् वनाः छगू छगू तःधंगु पार्टीइ आवद्ध जू मवँसें मगाः। बरु थ्व खः कि तःधंगु पार्टीतय्सं थःपिं तःधं धकाः चीधंगु पार्टीयात थः दुने विलय याना छ्वयेगु धइगु मानसिकता दयेके मजिउ। पार्टी चीधंसां अन बिचाः तःधंगु व बांलाःगु नं दयाच्वनेफु। अज्याःगु बिचाःयात थःगु पार्टीं अनुशरण याना वनेमाः। उकिं पार्टीयात हित हे याइ। एमालेया हकय् धायेगु खःसा थ्व पार्टी संविधानसभाया निगूगु तःधंगु पार्टी जुइगु तकं सम्भावना दुगुलिं थ्वलिसे बिचाः मिले जूगु चीधंगु पार्टीत उकी हे आवद्ध जुयाः थःगु समेत शक्ति विस्तार यायेगु बांलाःगु हे खँ जुइ ।

More Stories Like this