बांलाःम्ह मय्जु नेवाः म्हसीका ब्वयेगु दबू

नेपालभाषा ख्यः मेमेगु भाषाया गुगुं नं ख्यः स्वयां म्हो ग्ल्यामरस मजू धइगु खँ नकतिनि प्रज्ञा भवनय् क्वचाःगु "बांलाःम्ह मय्जु" ज्याझ्वलं नं पुष्टि याना बिल। ताः ई न्ह्यवंनिसें प्रचारय् वयाच्वंगु बांलाःम्ह मय्जु ज्याझ्वलं मय्जु अन्जला नकर्मियात बांलाःम्ह मय्जुया ताज लःल्हाःगु खः। झिंच्यादँनिसें नीस्वदँ तकया झिंन्हय्म्ह मय्जुपिंसं उगु ज्याझ्वलय् थःगु प्रतिभा न्ह्यब्वःगु खः। नेपालभाषा मंकाः खलःया छ्याञ्जे नरेशवीर शाक्य, कलाकार राजेन्द्रमान शाक्य, मोडल नोयो संह, फिल्म पत्रकार विजयरत्न असंबरे, छायांकार शंकर महर्जन, संगीतकार विजय वैद्य, साहित्यकार प्रकाश साय्मि, रीना शाक्य, कलाकार रामकृष्ण खड्गी पिंसं निर्णायकया भूमिका म्हितादीगु उगु ज्याझ्वलय् नरेशवीर शाक्यं 'पेज थ्री' रंगीन बाःछिपौया बांलाःम्ह मय्जु विशेषांक नं विमोचन यानादीगु खः ।

ज्याझ्वलय् बांलाःम्ह मय्जु ल्ययेगु निंतिं टप टेन व टप फाइभया ल्यज्या जूगु खः। टप फाइभ जुइत ताःलाःपिं मय्जुपिंत निर्णायक मण्डलं छगू न्ह्यसः बियाः स्वंगू मिनेट दुने लिसः बीत ई बिउगु खः खः। थुगु ट्यालेन्ट राउन्ड क्वचायेवं हे बांलाःम्ह मय्जु ल्ययेगु ज्या जूगु खः। ज्याझ्वःया मू आकार्षण बांलाःम्ह मय्जु खःसां नं थप आकर्षणया निंतिं मस्तय्गु र्‍याम्प वर्क नं न्ह्यब्वःगु खः। मयजु सरस्वती मानन्धरया म्येँ व 'समय्बजि' ज्याझ्वःया कलाकारपिनि नखःचखःया हुलाप्याखं नं ज्याझ्वलय् न्ह्यब्वःगु खः।बांलाः पहः धइगु मनूया म्हय् जक मखु वयागु प्रतिभाय् नं सुलाच्वंगु दइ धइगु बिचाः ज्वना वःपिं मय्जुपिं मध्ये मय्जु पारु श्रेष्ठ- मिस पपुलर, मय्जु दिव्यता श्रेष्ठ- मिस क्याटवर्क, मय्जु पूर्णिमा मानन्धर- बेस्ट स्माइल, मय्जु एलिना शाक्य- बेस्ट हेयर स्टाइल, मय्जु श्रृया श्रेष्ठ- मिस फोटोजेनिक जुइत ताःलाःगु खः। अथे हे मय्जु रजनी खड्गी सेकेन्ड रनरअप व मय्जु प्रेरणा महर्जन फर्स्ट रनरअप जुइत ताःलाःगु खः। ज्याझ्वलय् प्रेरणा महर्जनं मिस फोटो जेनिक व अन्जला नकर्मिं मिस ट्यालेन्टया उपाधि नं त्याकेत ताःलाःगु खः ।

ज्याझ्वलय् "बांलाःम्ह मय्जु" या प्रचार-प्रसार याःगु थीथी मिडिया, डिजाइनरपिं व प्रायोजन यानाः ग्वाहालि याःपिं सकलसितं मतिनाया चिं लःल्हायेगु ज्या नं जूगु खः।
नेपालभाषा ख्यलय् "मिस नेवाः" ज्याझ्वलं थुज्वःगु ब्युटी कन्टेस्टया क्रम न्ह्याःगु खनेदु। आः वयाः थुगु कन्टेस्टं तःधंगु हे थाय् काइगु खनेदु। मय्जुपिं थःगु औपचारिक ज्या बाहेक थुज्वःगु ज्याझ्वलय् नं न्ह्यचिलाच्वंगुलिं थौंकन्हय्यापिं मय्जुपिं प्रगतिया लँय् न्ह्यानाच्वंगु सीदु। ल्याखं धायेगु खःसा "मिस नेवाः", "नेवाः भाजु नेवाः मय्जु" धुंकाःया ब्यूटी कन्टेस्ट "बांलाःम्ह मय्जु" खः। थुगु ज्याझ्वलय् ब्वति काःपिं मय्जुपिंसं थुकी ब्वति कयाः थःगु आत्मविश्वासया तह अझ थहां वंगु अनुभव याःगु दु। थुज्वःगु ज्याझ्वलं मनूया दुने सुलाच्वंगु प्रतिभा पितब्वयेत ग्वाहालि जुइगु खँ नं ज्याझ्वलय् ब्वति काःपिं मय्जुपिंसं कंगु दु ।

More Stories Like this