सन्त नेता कृष्णप्रसाद भट्टराईया झ्वाता गन तयेमाली?



शान्तरत्न शाक्य

मौसम परिवर्तनं अस्वस्थताया कारणं स्वयम्भू वनेगु दिना तयागु खः। आकाझाकां इलाकिला मदुगु छगू अस्वस्थ बुखं जिगु न्हाय्पनय् न्हय्बि जुयाः दुहां वन - दिवंगत नेपाली कांग्रेसया संस्थापक नेता झी किसुनजी (उर्फ कृष्णप्रसाद भट्टराई)या म्हदुछिया झ्वाता (सालिक) स्वयम्भू भगवान पालिया सतिकं प्वंगु प्यासय् धस्वाकेत नेकांया सभापति सुशील कोइरालाजुया ल्हातिं शिलान्यास जुल धाःगु ।

थ्व ला तसकं अजूचायापुगु, अचम्मगु खँ जुल। हलिंन्यंकंया बौद्धतय्गु श्रद्धा व आस्थाया मू केन्द्र जुयाच्वंगु स्वयम्भू परिसर दुने छम्ह विशुद्ध हिन्दू धर्म दर्शनय् विश्वास व आस्था तइम्ह, राजनैतिक नेता, पार्टी परित्याग यानाः सन्त जीवन हनाच्वनादीम्ह व्यक्ति प्रति मिथ्या श्रद्धा ब्वयाः वय्कःया झ्वाता पशुपति क्षेत्रय् धस्वाकेगु मयासे स्वयम्भू क्षेत्रय् धस्वाकेगु ज्यां अथें हे शंकाया गन्ध स्वतः प्रस्फुतित जुइ। थ्व खँयात मध्येनजर तयाः बिचाः यायेगु खःसा थ्व तसकं मानसिक क्षुब्धता ब्वलंकीगु ज्याया शुरुवात खः। अथे जूगुलिं नेपाःया धार्मिक सरलता व सहिष्णुताय् लिच्वः मलाकेत आः हे तमाम बौद्ध क्षेत्रं थुकिया छाक्क क्वातुगु पलाः व सः तये फयेकेमाः। सः तइ धइगु भलसा व विश्वास नं दु ।

नेपाः धार्मिक सहिष्णुता व शुद्धताय् विश्वास याइगु देश खः। धार्मिक कचवं मदयेमा धकाः हे विद्यमान हिन्दु राष्ट्रया थासय् 'धर्म निरपेक्ष राष्ट्र' जुइमाः धकाः बौद्ध जनतां सः तया वयाच्वंगु खः। अन्तरिम व्यवस्थापिकां अन्तरिम संविधानय् 'नेपाः धर्म निरपेक्ष राष्ट्र' घोषणा यात। थ्व तसकं स्वागतयोग्य ज्या खः। थ्व ज्यां नेपाः बुद्धया जन्मभूमि कथंया आदरसम्मान हलिमय् न्ह्यःने तया बिल ।

नेपाः जनतां कानून, नजिरउदाहरण, धार्मिक सामाजिक मूल्य मान्यतायात सम्मान याइगु देश कथं नं हलिमय् चर्चित जू। नेपाली परम्पराय् थ्व खँ दु। विगतया घटना, नजिर व दसुयात ध्यानय् तयाः धायेगु खःसा नेपालभाषाया महाकवि कविकेशरी चित्तधर 'ह्दय'जुया झ्वाता तयार जुयाः नं स्थानाभावं धस्वाकेगु ज्या जुइ मफयाच्वंगु खः। छाउनीस्थित राष्ट्रिय संग्रहालय् (म्युजियम) न्ह्यःने स्वदुवातय् प्वनाच्वंगु थासय् झ्वाता तयेत कुत याःगु खःसां अन झ्वाता तयेके तकं मबिसे चांचां गणेदेगः व सिमा पिना बिल। लिपा वनाः राष्ट्रिय धावक बैकुण्ठ मानन्धर व स्थानीय जनताया कुतलं कालिमाटी दुवातय् कविजुया झ्वाता पलिस्था यायेत ताःलाःगु खः।
स्वयम्भू भुइख्यः परिसर सम्यक महादान अन्तर्गतया जग्गा खः। सम्यक गुथिया नामय् लालपूर्जा नं कायेधुंकल धाःगु नं न्यनेदु। थुज्वःगु थासय् सन्त नेता किसुनजीया झ्वाता तयेगु धइगु झ्वाता प्रति अनादर जुइगु ज्या खः। अथे जूगुलिं विगतया घटना, नजिर, दसु व अनुभवया आधारय् धायेगु खःसा (१) किसुनजीया झ्वाता वय्कलं अप्वलं ई बियाः च्वनादीगु बन्द्यगां (बरेगां) खसकरण कथं 'बाडे गाउँया' आश्रम दकलय् बांलाःगु युक्तिसंगत थाय् खः।
(२) नेपाली कांग्रेसया संस्थापक नेता कथं कांग्रेसया मू ज्याकू सानेपा (३) वय्कःया पुर्खाया जन्म स्थल गोरखाय् वय्कःया झ्वाता सहितया मनोरम पार्क निर्माण यानाः तयेगु दकलय् उचित जुइ। नेपाली जनताया चाहना नं थ्व खः ।

सन्त नेता कृष्णप्रसाद भट्टराईया जन्मस्थल बनारसय् छगू झ्वाता निर्माण यायेमाःगु सुझाव नं थ्व अवसरय् लुमंक हे तयाच्वना। भारत स्वतन्त्रताया आन्दोलनय् वय्कलं नं ई, श्रम व त्याग यानादीगु दु। लिसें वय्कः भारतया जेलनेल तक नं सामना यानादीम्ह नेता जूगुलिं वय्कःया झ्वाता बनारसय् तयेगुली भारतीय जनता व सरकारया नं उलि हे दुग्यंगु ग्वाहालि मदइ धकाः धाये मफु। थुलि हे आशा व भलसा प्वंकाच्वना किसुनजीया झ्वाता स्वयम्भूइ मतयेत विनम्र इनाप नं यानाच्वना ।

More Stories Like this

जातीय संघीयताया खँय् नेमकिपा
प्राडो, पाजेरो ब्वाकेगु ख्यः मखु
राष्ट्रपति प्रणाली बारे विवाद
नेवाःतय्त जागृत याइगु 'नेपाःमिया नुगः सः'
खँ स्वनिगःया