नेवाः पुचः इटहरीया झिंनिक्वःगु दँ मुँज्या
नेवाः पुचः इटहरिया झिंनिक्वःगु दँ मुँज्या व साधारणसभाया उलेज्या नेवाः देय् दबूया नायः नरेश ताम्रकारं छगू समारोहया दथुइ यानादिल ।
नेवाः पुचःया नायः भाजु चित्रमान प्रधानया नायसुइ जूगु उगु ज्याझ्वलय् नेवाः पुचःया प्रतिनिधित्व यानाः नेवाःतय्गु राष्ट्रिय संगठन नेवाः देय् दबूया नायः पदय् तक थ्यंके फुगुलिं देय् दबूया नायः नरेश ताम्रकारयात दोसल्ला गां न्ययेका हना पौ लःल्हासें हनेज्या याःगु खः ।
अथेहे इटहरी लगायतया थासय् नेवाःतय्गु संस्कृतिया प्रचार व स्यनेगु ज्याय् ग्वाहालि याःगुलिं मध्यपुर कला परिषदया गणेशराम लाछियात नं दोसल्लां न्यायेका हनेज्या याःगु खः । ज्याझ्वलय् इटहरी नेवाः पुचः नीस्वनेत ग्वाहालि याःगुलिं मदुम्ह उमेश श्रेष्ठयात नं हन ।
अथेहे इटहरी नेवाः पुचःयात जग्गादान याःपिं मध्ये दक्कलय् अप्वः दां बिउपिं पुलांम्ह नायः राजेश श्रेष्ठ व पुलांम्ह नायः काजीलाल श्रेष्ठयात नं हन । उगु समारोहय् स्वम्ह ज्याजंक्वः सिधिपंत नं सम्मान पौ व दोसल्ला न्ययेका हनेज्या जुल । नापं एसएलसीइ अप्वः ल्याः हःपिं प्यम्ह विद्यार्थीपिंत नं सम्मान याःगु खः ।
उगु समारोहय् न्ववानादिसें नेवाः देय् दबूया नायः नरेश ताम्रकारं नेवाःतय्त छप्पं व छधि यासें नेवाः पहिचान सहितया नेवाः राज्य व पिनेच्वंपिं नेवाःतय्गु पहिचान सहित प्रतिनिधित्वया निंतिं नेवाः देय् दबूं संविधानय् च्वयेकेत दवाव बियाच्वनागु खँ कनादिल ।
आदिवासी जनजाति महासंघ इटहरीया छ्याञ्जे मीन आलेमगरं आदिवासीतय्गु अग्राधिकारया निंतिं जुयाच्वंगु आन्दोलनय् नेवाःतय्सं अग्रणी भूमिका म्हिताच्वंगु खँ कनादिल ।
News Location:
More Stories Like this
कन्याम इलामय् नेपालभाषा कक्षा न्ह्यात धिमे बाजं व भाषा प्रशिक्षण ज्याझ्वः क्वचाल थुर्पुय् स्वक्वःगु लाखे प्याखँ धेधेबल्ला ओखलढुंगाय् नेपालभाषा कक्षा क्वचाल नेवाः देय् दबू ओखलढुंगा तदर्थ समिति स्वन
