माओवादी विभाजनया सन्देश
डा. बाबुरामं पार्टी तछ्याःगु एसएमएस वयाः हैरान
येँ (सन्ध्या टाइम्स)/पार्टी दुने स्वंगू लाइनया विवाद तच्वया वनाच्वंगु इलय् माओवादी पार्टी उपाध्यक्ष डा. बाबुराम भट्टराईनं विभाजन यात धकाः मोबाइलपाखें एसएमएस छ्वयाः त्रासपूर्ण भ्रम न्यंकेगु ज्या जुयाच्वंगु लूगु दु ।
पार्टी अध्यक्ष प्रचण्डं ल्याय्म्ह नेतातय्त सःताः बाबुरामं पार्टी तछ्याइगु सम्भावना अप्वया वःगुलिं होश यायेमाल धयादीगुया छुं दिं लिपा हे थुकथं पार्टी विभाजनया एसएमएस आतंक शुरु जूगु खः। थज्याःगु हल्ला जुइवं थौं सुथय् थीथी जिल्लां वयाच्वंपिं कार्यकर्तात उपाध्यक्ष डा. भट्टराईया छेँय् वनाः छु यानादियागु धकाः न्यनेकने समेत याः वंगु खः।
सानेपास्थित थःगु छेँय् वःपिं चिन्तित कार्यकर्तातय्त वय्कलं थ्व भ्रामक प्रचारवाजी जक खः, थः अन्तिम इलय् तक नं पार्टी एकताया नितिं ल्वानाच्वनेगु जुइ धकाः लिसः बियादीगु खः। नेता भट्टराईनं पार्टी तछ्यायेगु त्रास ब्वलंकाः पार्टीयात कब्जा यायेगु अभियान अन्तर्गत थ्व गोयवल्स शैलीया प्रचार जुयाच्वंगु द्वपं नं बियादिल ।
थःगु छेँय् वःपिं कार्यकर्तातय्त वय्कलं धयादिल, 'न्हापा न्हापा नं तःक्वःमछि हे जितः अन्यायपूर्ण रुपं कारवाही यानाः पार्टी तछ्यायेत बाध्य यानाः अपमान याःसां पार्टी एकताया नितिं न्ह्याः वनाच्वनागु स्वंगू दशक दयेधुंकल। आः नं जिं पार्टी तछ्याइन धकाः वःगु खँ हल्ला जक खः।'
वय्कलं पार्टी तछ्यायेगु नितिं आः वयाः 'नव आलोक व रविन्द्र प्रवृत्ति' वयाच्वंगु नापं उकियात परास्त याना वनेत तकं कार्यकर्तातय्त आह्वान यानादिल। झिदँया जनयुद्धया जग व द्वलंद्वः सहिदतय्गु बलिदानं वःगु उपलब्धीयात लाका मकायेकेगु निंतिं पार्टी दुने तःधंगु एकताया आवश्यकता दु धासें वय्कलं धयादिल, 'पार्टी दुने जुइमा वा पिने जुइमा एकीकृत माओवादीयात सुना नं कुचा थलेगु चाहाना यात धाःसा, म्हगस खन धाःसा उकियात चकनाचुर यायेगु जुइ ।'
लिपांगु इलय् वयाः पार्टी दुने वैचारिक वहसयात अस्वस्थ यायेगु ज्या जुयावःगु दु धासें वय्कलं अज्याःपिं मनू व प्रवृत्तियात सशक्त कथं प्रतिरोध यासें परास्त यानाः एकता व रुपान्तरण अभियानय् न्ह्याः वनेमाः धकाः बः बियादिल। माओवादी दुने थौंकन्हय् अध्यक्ष प्रचण्ड, उपाध्यक्षपिं मोहन वैद्य व डा. भट्टराईया स्वंगू अलग अलग धार दु ।
