सरकारयात प्राप्त दुई तिहाई व कांग्रेस

सेना समायोजनया मोडालिटी तयार यायेगु खँय् सहमति जुइवं आः वर्तमान सरकारय् मधेसी जनअधिकार फोरम नं दुहां वनीगु निश्चित दु। उकिया लागिं फोरम अध्यक्ष उपेन्द्र यादव समेत च्वनाः माओवादी अध्यक्ष प्रचण्ड व एमाले अध्यक्ष एवं प्रधानमन्त्री झलनाथ खनाल दथुइ सहमति नं जूगु दु। यादवया फोरम नं सरकाय् दुहां वनेसातकि थ्व सरकार बहुमत प्राप्त जक मखु दुई तिहाई बहुमत प्राप्त सरकार जुइ। दुई तिहाई प्राप्त जुइ सातकि थ्व सरकार संविधान दयेकेगु ज्याय् समेत हावी जुइ फइ। संविधान दयेकेगु ज्याय् यदि छुं बुँदाय् सहमति जुइ मफुत धाःसा मतदान यायेगु व दुई तिहाई बहुमतं पारित याना छ्वयेगु व्यवस्था दु। उकिं सरकारयात प्राप्त थ्व दुई तिहाई बहुमतं कन्हय् संविधान दयेकेगु ज्याय् समेत सुविधा जू वनीगु खनेदु ।

तर संविधान थेंज्याःगु देशया सम्पूर्ण जनतां पालना यायेमाःगु दस्तावेज मात्र दुई तिहाइं पारित यायेगु ज्या मजूसा बांलाः। सरकारयात कांग्रेसं समर्थन मयाःगु कारणं कन्हय् संविधान दयेकेगु ज्याय् नं अनेक बुँदाय् कांग्रेसं बिमती क्यने फइगु सम्भावना दु। उकिं दुई तिहाई बहुमत दु धकाः कांग्रेसयात पिने वांछ्वयेगु पाय्छि जुइ मखु। वयात नं सहमति हयाः जक संविधान दयेकेगु कुतः जुइमाः। लिसें कांग्रेसं नं दुई तिहाई बहुमतं पारित याःगु बुँदायात जिमिसं माने याये मखु धायेगु पाय्छि जुइ मखु। कांग्रेस यदि प्रजातान्त्रिक पार्टी खःसा बहुमतयात स्वीकार यायेगु बाहेक वयाके मेगु विकल्प मदु। बहुमतं नं अल्पमतया सम्मान यायेगु, अल्पमतं नं बहुमतया कदर यायेगु ज्या न्ह्यात धाःसा संविधानयात स्वीकार यायेत सहज जू वनीगु खइ ।

More Stories Like this