गुबलय् यायेगु कांग्रेस ज्याकू घेराउ?
वंगु बिहीवाः (२४ मार्च २०११) कुन्हु धौख्य रिसोर्टय् संवैधानिक समितिं निस्वंगु उपसमितिया मुँज्या च्वन । न्यागू दलया निम्ह-निम्ह नेतातय् जक ब्वति दुगु मुँज्या लिपा नेपाली कांग्रेस संसदीय दलया नेता रामचन्द्र पौडेलं नेपाःयात संघीय रुपय् यंकेगु खःसा विशेषज्ञत दुगु राज्य पुर्नसंरचना आयोग निस्वःने माःगु अडान कांग्रेसं का:गु प्रतिक्रिया बियादिल ।
विशेष यानाः राज्य पुर्नसंरचनाया मुद्दाय् केन्द्रीत जुयाः च्वंगु उगु मुँज्या लिपा पौडेलया प्रतिक्रिया न्यनेधुंकाः अग्रगामि शक्तित नापं नेपाः संघीयतय् वनेधुकूगु महशुस यानाच्वंपिं आम नेपाःमित अजू चाःगु जुइफु । गनं वय्कःया धापूं आयोग गठन यानाः राज्य पुर्नसंरचना यायेमाः मखुसाः एकात्मक प्रणाली हे पाय्छि जू धकाः धायेत्यंगु खःला धइगु गन्ध झीसं कायेफु ।
अन्तरिम संविधानं नेपाःयात 'संघीय लोकतान्त्रिक गणतन्त्र' देय् धकाः न्ह्यथने धुंकूसां गज्याःगु संघीय व्यवस्था धइगु व्याख्या यायेगु जिम्मा संविधानसभायात बियातःगु खः । थ्वहे अन्तरिम संविधानं यानातःगु नेपाःया व्याख्या लिपा नेपाःमितय्सं आः संविधानसभां राज्य पुर्नसंरचनाया व्याख्या याइगु जूसां नेपाः संघीय मुलुकया धलखय् वनेधुंकूगु आभाष यायेधुंकूगु खः ।
देय्या हे दकलय् तःधंगु लोकतान्त्रिक पार्टी धकाः दावी यानाच्वंगु कांग्रेसं अझ नं जनजाति, मधेशी, दलित लगायत मिसातय् सवालय् उद्दार जुयाः निर्णय यायेफूगु मदुनी । थौं राज्य पुर्नसंरचनाया सवालय् यक्व धाइथें पार्टीं संविधानसभाया राज्य पुर्नसंरचना व राज्य शक्तिय बाँडफाँट समितिया प्रस्तावयात ज्वनाः थप सहलह यायेमाःगु पक्षय् दु । उखे कांग्रेस व मेगू छगू-निगू पार्टी धाःसा अझ नं उकि सहमत जुइमफुनी ।
धाथें देय्या तःधंगु लोकतान्त्रिक पार्टीं यानाच्वंगु थ्व अनुद्दार निर्णयं यानाः निलाया दुने न्हूगु संविधान निर्माण जुइगु खः वा मखु धइगु ग्याचिकु मनूतय्के अझ नं गाक्क हे दनी । म्हिगः (२७ मार्च २०११, संचवाः) छगू ज्याझ्वःया दथुइ माओवादी नायः प्रचण्डं यदि सेना समायोजन व राज्य पुर्नसंरचनाया बारे सहमति जूसाः पाय्छि इलय् हे संविधान वइगु दावी यानादिल ।
उखे प्रधानमन्त्री झलनाथ खनालं न्यय्न्हुया दुने सेना समायोजनया खाका तयार जुइधुंकूगु उद्घोष यानादीधुंकूगु दु । प्रधानमन्त्री खनाल व माओवादी नायःया धापू स्वयेगु खःसा आः इलय् हे संविधान निर्माण यायेत मू बाधा धइगु राज्य पुर्नसंरचना जक खः । यदि थुगु बुँदाय् नं सहमति जूसा: नेपाःमितय्सं मेगू खुइन्हुया दुने न्हूगु संविधान खनीगु सम्भावना दु ।
मतलव इलय् हे संविधान निर्माण जुइ वा मजुइ धइगु खँ आः कांग्रेसया ल्हातय् दु । कांग्रेसं राज्य पुर्नसंरचना आयोग गठन यानाः जक राज्य पुर्नसंरचना यायेमाः धकाः कयाच्वंगु अडानं नेपाःयात संघीयताय् वनेगु पाखें जक मखु न्हूगु संविधान निर्माण जुइगु पाखें नं पनाच्वंगु दु । झीत इलय् हे न्हूगु संविधान नं माःगु दु, उकि दुने अग्राधिकार व आत्मनिर्णयया अधिकार सहितया नेवाः स्वायत्त राज्य दुगु संघीय व्यवस्था नं माःगु दु । उकिं आः कांग्रेसयात याकनं सहमतिइ हयेगु निंतिं कडा दवाब आवश्यक दु ।
कांग्रेस मू ज्याकू घेराउ यायेगु लिसें संघीयताया विपक्षय् दनाच्वंपिं नेतातय् छेँय् तकं घेराउ याना: दबाव वीगु वा मेगू उपाय मार्फत दवाब बीगु, थ्व पला ल्ह्वनेत आवश्यक जुइधुंकूगु दु । थुकि फुक्कं मधेशी, जनजाति, दलित लगायतया भूमिका ला अहम जू हे जुइ । तर थ्वस्वयां नं संघीयता पक्षधर कांग्रेसी नेवाःतय्त भूमिका महत्वपूर्ण जुइ । उकिं कांग्रेस नेतातय्सं आः थः हे नेतातय्त दवाब बीत कुहांवयेमाःगु दु, नेवाः स्वयात्त राज्य, संघीयता व न्हूगु संविधानया निंतिं ।
More Stories Like this
मेरिल्याण्डय् लाखय् व पुलुकिसिलिसे हन येँयाः स्यस्यः समाजं सत्यमोहन जोशीयात हन मूलयात ग्वाहालि लःल्हात मेहेन्दी च्वयेगु कासा जुइगु मचातयत मां भाय् स्यनेगु संस्था नीस्वन
