द्वंया मूर्ति दुरु त्वन

भगवानयात आःतक सुना नं खंगु मदुनि तर बर्दियाया अप्वः धयाथे बासिन्दा धाःसा थःगु हे गाँमय् भगवानया बाहान वःगु धासें लसतां दंग जूगु दु । बर्दियाया सदरमुकाम गुलरिया स्थित बागेश्वरी देगलय् च्वंगु शिव भगवानया बहान नन्दी द्वंया मूर्ति मदिक्क ३० घण्टा स्वयां अप्वः ई तक लः त्वनेवं इमिसं भगवान साक्षात प्रकट जूगु विश्वास याःगु दु । नन्दीं लः त्वंगु हल्ला जुइवं देगलय् भक्तजन व सर्वसाधराणया भीड हे जूगु दु । इमिसं नन्दी द्वंयात लः त्वंकेत धेधेंबल्ला यानाच्वंगु दु । नन्दीया म्हुतु न्ह्यःने लः वा दुरु तयाबिइवं स्वतः द्वःया म्हुतुइ वनेवं सर्वसाधारण भगवानया लीला धासें अचम्म जूगु दु । तर छुं गाउँलेतय्सं धाःसा थ्व दैवि शक्ति मखसें थुकिया बैज्ञानिक कारण मालेमाःगु तर्क तःगु दु ।

अथेहे दाङया अप्वः धयाथे शिवया देगलय् च्वंपिं द्वं नं भक्तजनतय्सं छाय्हःगु साया दुरु त्वनेवं सर्वसाधारण अचम्म जूगु दु । दाङ्गया अप्वः धयाथे शिबया देगलय् सिमेन्ट व मार्बलं दयेकातःगु द्वहंया मूर्तीं भक्तजनं ब्यूगु साया दुरु त्वनेवं देगः जःखः भक्तजनतय्गु भीड हे जूगु दु । घोराही नगरपालीका १० थाना रोडय् च्वंगु शिब देगलय् द्वहं नं दुरु त्वंगु भक्तजनतय्सं धाःगु दु । देगः सुरक्षार्थ खटेजूपिं प्रहरी तकं द्वहं नं दुरु त्वंगु खना अचम्मित जूगु दु । दाङया मेगु शिव देगलय् च्वंगु द्वहंया मूर्तिं दुरु त्वंगु उगु क्षेँत्रया वासिन्दां धाःगु दु । द्वं नं दुरु त्वंगु खँ सार्बजनिक जुइवं दाङ्ग घोराहीया निगू थासय् व धर्ना गाबिसया धारपानिइ तकं सर्वसाधारणया भीड जूगु दु । तर छुं मनूतय्सं धाःसा निर्जिब बस्तुं दुरु त्वंगु धैगु भ्रमपुर्ण प्रचारबाजि जूगु धाःगु दु ।