हत्या विरुद्ध टेकुइ लँ पनाः प्रदर्शन
प्रदर्शनकारीयात प्रहरीपाखें लाठीचार्ज
येँ (सन्ध्या टाइम्स)/टेकुया सुप्रवि ब्याट्री कारखानाय् ज्या याइम्ह मजदुर प्रेमकृष्ण महर्जनयात म्हिगः कारखानाय् हे वयाः छथ्वः लुटेरातय्सं गोलीं कयेकाः स्याना बिउगु विरोधय् थौं स्थानीय जनता व मदुम्ह महर्जना थःथितिपिंसं टेकु लागाय् प्रदर्शन यात। उगु प्रदर्शनय् प्रहरीं लाठीचार्ज याःबलय् खुम्ह प्रदर्शनकारी घाःपाः जूगु दु ।
म्हिगः घटना जूगु कारखाना न्ह्यःने थौं सुथय् ८ बजेनिसें प्रदर्शन शुरु जूगु खः। प्रदर्शनकारीतय्सं कारखानाय् नं सामान्य तोडफोड याःगु दु। उमित लाठीचार्ज याःबलय् मदुम्ह महर्जनया तता लक्ष्मी महर्जन घाःपाःगु जूगु दुसा दाजुम्ह बुद्धि महर्जन व स्थानीयवासी जितेन्द्र महर्जनयात प्रहरीं ज्वना यंकूगु दु ।
प्रदर्शनकारीतय्सं टेकुया उगु लँ हे बन्द यानाः विरोध यानाच्वंगु खः। नेपाः भ्रमणय् वःम्ह चीनया जनसेना प्रमुख लिहां वनेत ९ बजे पाखे छझाः लँ चायेकाः वयां लिपा हानं बन्द याःगु खः। मदुम्ह महर्जन बादेगां निवासी खः। थौंया प्रदर्शनय् बाडेगांया सलंसः स्थानीय मनूतय्सं ब्वति कयाच्वंगु दु। प्रदर्शनय् आपालं नेवाः मिस्तय्सं नं ब्वति काःगु खः। प्रदर्शनकारीतय्सं लाठीचार्जया विरोध यासें कालिमाटी प्रहरीया डीएसपी भोला रावतयात झातापाता यात ।
बादेगांया २६ दँया प्रेमकृष्णयात म्हिगः बहनी स्वम्ह अज्ञात मनूतय्सं वय्कः ज्या याइगु टेकुया कारखानाय् वयाः गोलीं कयेकूगु खः। महर्जनया दाजु बुद्धि महर्जनं 'सन्ध्या टाइम्स' यात कनादी कथं प्रेमकृष्णं खुला न्ह्यः तिनि उगु कारखानाय् ज्या याःगु खः। थ्व घटनाय् स्वापू दुपिं अपराधीतय्त कारवाही मयाःतले थःपिं सुम्क मच्वनेगु खँ वय्कलं कनादिल। गोलीं कयाः मेम्ह छम्ह मजदुर नं घाःपाः जूगु दु ।
थ्वहे दथुइ घटनायात कयाः वार्ता याकेत बादेगां लागाया सभासद् पम्फा भुषालं पहल यानादीगु दु। थौं सुथय् टेकुइ वनाः वय्कलं पीडित परिवारयात नापलादीगु दुसा उमित नं ज्वनाः झ्फ्नुमानध्वाखा डीएसपी ज्याकुथी खँ ल्हाः वंगु दु ।
News Location:
