चित्रकारपिंसं च्वयातःगु पौभाः

प्रेमलाल चित्रकार

नेपाःया चित्रकारतय्सं थीथीकथंया द्यःपिनि च्वसु च्वयाः थःगु संस्कृति, संस्कार व सम्पदायात न्ह्याका वयाच्वंगु खनेदु। अज्याःगु च्वसात मध्ये नेपाःया अनेक द्यःपिनिगु यथार्थ वर्णन जुइ कथंया पौभाःत नं च्वयाः सेवा याना वयाच्वंगु खनेदु ।

पौभाः धइगु परम्परागत चित्रकला खः धइगु आपाःसिया धापू दु। वास्तवय् पौभाः बारे थुलि जक धायेगु पूर्णथें आपाःसित मतायेफु।द्यःपिनिगु यथार्थ वर्णन यानाः च्वयातःगु चित्रकलायात हे पौभाः धायेगु याइ। गुम्ह द्यःया पौभाः च्वयातःगु खः उम्ह द्यःया पौभालय् यथार्थ वर्णन स्पष्ट खनी कथं च्वयातःगु जुइमाः। दसुया निंतिं मिडियाया न्ह्यःने वये मास्ते मवःम्ह स्व. पृथ्वीलाल चित्रकारं च्वयातःगु अमिताभया पौभाःयात कायेफु। थ्व पौभाः स्वयेगु खःसा अमिताभया पौभाः धकाः पौभालय् मिखापु लायेवं धायेफु। थुम्ह द्यःया लक्षणत मध्ये दिशाकथं थुम्ह द्यः स्वयेवं पश्चिम दिशाय् स्वयाच्वंम्ह, ह्याउँगु वर्ण, ध्यान मुद्राय् च्वनाच्वंगु जुइमाः। थुकथंया लक्षणत पूवंकाः च्वयातःगु पौभाःयात पुज्यानाः पलिस्था याना तइ। गथे कि दिक्षा अभिषेक, सिन्दुरात्मक पूजा आदि। थुकथं चित्रकारतय्सं च्वइगु पौभाःत थीथी ल्याखं पूवंक च्वया वयाच्वंगु खनेदु। उकिं पौभाःयात खालि पौराणिक व परम्परागत चित्र जक धयां मगाः ।

च्वय् न्ह्यथनाकथं च्वयातःगु पौभाः पूवंक किसिमयागु जूसा ततःधंगु पूजाबलय् हालीगु चचाय् समेत ग्वाहालि जूवनेफु। उकिं पौभाः पूवंगु किसिमं च्वया यंके फयेमाः। च्वइपिं न्हूपिं पुस्तायापिंत नं थ्व खँय् बांलाक विचाः याना पौभाः च्वया वनेमाः ।

More Stories Like this