लोडशेडिंग क्वपालेगु महत्वाकांक्षी ग्वसाः

लोडशेडिंगं यानाः जुयाच्वंगु समस्यायात वाःचायेकाः सरकारं छगू वृहत् ग्वसाः न्ह्यःने हःगु दु। आः वइगु प्यदँया दुने देय्यात लोडशेडिंग मुक्त यानाः वयां लिपा २५०० मेगावाट मत उत्पादन यायेगु महत्वाकांक्षी योजना दयेकाः सार्वजनिक याःगु दु। सरकारया थ्व योजनायात सुनां नं विरोध यायेमाःगु आवश्यकता मदु। यदि थ्व योजना कथं ज्या याये फत धाःसा वहे नं छगू उर्जा क्रान्ति जुइगु खँय् शंका मदु ।

तर सरकारं थ्व गुगु योजना हःगु खः, व पूवनीगु सम्भावना धाःसा पटक्क हे मदु। थुकिं यानाः सरकारी योजनां जनता उत्साहित जूसां निराश नं जूगु दु। दकलय् न्हापां ला मेगु प्यदँ तक थ्व सरकार हे दइ मखु। मेगु सरकार वयेसातकि वं पुलांगु सरकारं दयेका तःगु छुं नं योजनायात न्ह्यःने न्ह्याकी मखु। थ्व नेपाःया राजनीतिक विडम्बना खः। उकिं सरकारं हःगु थ्व योजना मेगु महिना लिपा हे सरकार स्वयमया ल्वःमनेधुंकी धकाः झी ढुक्क हे जूसां जिउ। सरकारं थज्याःगु योजना थम्हं पूवंकेगु कार्यक्रम सिबें नं छपु उत्साहजनक साहित्यिक निबन्ध थें जक प्रस्तुत याइगु जूगुलिं छुं नं सरकारं हइगु ग्वसाःयात आः जनतां पत्याः मयायेधुंकल। आः हःगु थ्व योजनाय् नं सरकारं गुगुं छगू बुँदाया छुं छगू जक अंश पूवंकाः क्यंसां नं जनता छुं भचा आशावादी जुइगु खइ। जलस्रोत नेपाःया दकलय् तःधंगु प्राकृतिक स्रोत जूगु जूगुलिं थुकी राष्ट्रिय जक मखु अन्तर्राष्ट्रिय राजनीतिं तकं उतिकं हे भूमिका म्हिताच्वंगु दइ। मात्र प्यदँया दुने सरकारं थ्व ज्या याइ धकाः आशा यायेगु थाय् तसकं म्हो जक दु। ज्या यानाः मक्यंकं सरकारया तारिफ यायेगु पाय्छि जुइ मखु ।

More Stories Like this