म्यानमारय् ६.८ रेक्टरया भुखाय्

Posted on Thu Mar 24, 2011 11:23 pm NST

उत्तर पूर्वी म्यानमारय् बिहीवाः बहनी भुखाय् ब्वःगु दु । ६.८ रेक्टर स्केलया शक्तिशाली भुखाय्या धक्का नापसं लाःगु देय्त लोओस व थाइल्याण्डय् नं महसुश जूगु ख:सा भुखाय्या हुनिं छम्ह सीगु दु ।

भुखाय्या हुनिं म्यानमारय् ५०म्ह सीगु दुसा: ४०म्हं मल्याक घा:पा: जूगु दु । उखे थाइल्याण्डया उत्तरी क्षेत्रय् लाःगु च्याङ राइ शहरय् नं छम्ह मिसा सीगु ख: । भुखाय्या धक्का लिपा अन छखा: छेँ नं अप्पा कुतुंवयाः मिसाया छ्योनय् लानाः मदुगु खः । च्याङ राइ शहरं ११० किलोमिटर तापाक च्वंगु थाय्यात केन्द्रविन्दु दयेकाः भुखाय् ब्वःगु खः ।

शक्तिशाली भुखाय् लिपा अन हानं ४.८ व ५.४ रेक्टर स्केलया भुखाय्या धक्का हानं महसुश जूगु खः । भुखाय् समुन्द्र स्वयां तापाःगु जमिनय् ब्वःगुलिं अन सुनामीया खतरा धाःसा मदुगु अधिकारीतय्सं धाःगु दु ।