लडाकु बारे थौं महत्वपूर्ण निर्णय

५० न्हुया दुने सेना समायोजन यायेगु तयारी

येँ (सन्ध्या टाइम्स)/ताः ई न्ह्यवंनिसें विवादया विषय जुयाच्वंगु सेना समायोजनया बारे थौं महत्वपूर्ण निर्णय जुइगु खँ धाःगु दु। सेना समायोजन गय् यानाः यायेगु व गुगु स्वरुपं यायेगु धकाः जुयाच्वंगु विवाद ज्यनी कथं थौं सेना समायोजन सम्बन्धी समितिं महत्वपूर्ण निर्णय याइगु खँ सूत्रं धाःगु दु ।

सूत्रया कथं थ्वहे वइगु न्यान्हुया दुने सेना समायोजन सम्बन्धी विस्तृत खाका तयार यायेगु सहमति दलतय् दथुइ जूगु दु। सेना समायोजनया उगु खाका कथं आः वइगु ५० न्हुया दुने सेना समायोजनया ज्या पूवंकेगु ग्वसाः समेत दुगु खँ धाःगु दु ।

सेना समायोजनया थ्वहे खँ समाधान याये मफयाः देय्या शान्ति प्रक्रिया व संविधान च्वयेगु ज्या न्ह्याः वने मफयाच्वंगु खः। लिसें सेना समायोजनया खँयात हे त्वहः दयेकाः एमालेया छुं नेतातय्सं माओवादीयात गृह मन्त्रालय बी मखु धकाः अडान काःगु खः। आः थ्व समायोजनया नक्सा तयार जुइवं माओवादीं गृह मन्त्रालय दावी यायेफुगु खँ नं धाःगु दु ।

संविधान च्वयेगु निंतिं आः यक्व ई मदयेधुंकल। उकिं सेना समायोजन सम्बन्धी थ्व ज्या संविधान च्वयेगु ई ल्यं दनिगु दुने हे यायेगु कथं ५० न्हु तःगु खँ सूत्रं धाःगु दु ।

सेना समायोजन यायेबलय् माओवादी लडाकुयात बिस्कं दस्ता कथं थाय् बीगु लाकि मबीगु धइगु खँय् नं आः तक छुं निर्णय जूगु मदुनि। थौंकन्हय् थीथी शिविरय् च्वनाच्वंपिं माओवादी लडाकुतय्थाय् वनाः विशेष समितिं सरकारी सुरक्षा निकायय् दुहां वनेगु लाकि सीप सयेकाः थःगु हे व्यवसायय् वनेगु धकाः न्यनेकने यायेगु ज्या यानाच्वंगु दु। अज्याःगु ज्याय् संलग्न विशेष समितिया संयोजक बालानन्द शर्मां आः तकया अवस्था स्वयेबलय् ग्वःम्ह लडाकुयात गन छ्वयेगु धइगु संख्याया खँय् समस्या जुइ ख्वाः मवः धयादीगु दु। वय्कलं संख्या तोके यायेगु सिबें नं राजनीतिक सहमति मजुयाः समस्या जुयाच्वंगु खँ कनादीगु दु ।

सहमति जुइवं फोरम सरकारय्
माओवादी लडाकुया समायोजन गय् यानाः यायेगु धइगु खँ क्वःजीवं मधेसी जनअधिकार फोरम नं वर्तमान सरकारय् दुहां वनीगु खँ धाःगु दु। समायोजनया खाका तयार मजूतले फोरम सरकारय् वनेगु मखु धकाः धयाच्वंगु खःसां थौं जुइगु महत्वपूर्ण निर्णय लिपा फोरमया लागिं नं सरकारय् दुहां वनेगु लुखा चालीगु खँ उकिया अध्यक्ष उपेन्द्र यादवं धयादीगु दु। यादव सरकारय् दुहां वयेवं सरकारया नीति तथा कार्यक्रम नं तयार जुइगु खँ विज्ञ सूत्रं धाःगु दु ।