अख्तियार दुने हे आन्तरिक छानबिन

पुलांम्ह मन्त्री चिरंजीवी वाग्लेयात भ्रष्टाचारया द्वपं बियाः जेल चलान यायेधुंकाः आः स्वय्म अख्तियार दुने नं भ्रष्टाचार यानाच्वंपिं मनूतय्त कारवाही यायेगु पलाः न्ह्याकेत्यंगु बांलाःगु समाचार वःगु दु। अख्तियार दुरुपयोग अनुसन्धान आयोग देशय् भ्रष्टाचा याइपिं पदाधिकारीतय्त कारवाहीया लागिं मुद्दा तइगु निकाय खः। उकिं थ्व संस्थाया शुद्धता मेपिनिगु स्वयां बांलाये माःगु खँय् शंका मदु। तर गुलिखे मनूतय्सं थः प्रतिद्वन्द्वीयात दुःख बीत अख्तियारय् उजुरी तयेगु व अख्तियारया पदाधिकारीं थःगु अख्तियारीया दुरुपयोग यानाः छानबिन न्ह्याका बीगु ज्या नं जुयाच्वंगु दु। अथे हे गुलिखे ज्याखँय् ज्या जुइ न्ह्यः हे अख्तियार वा संसदया लेखा समितिइ हे उजुरी तया बीगु व थ्व निकायपाखें उकी भ्रष्टाचार जूगु मदु धकाः ज्या शुरु जुइ न्ह्यः हे 'क्लिन चिट्' बियाः उकी न्ह्याक्व भ्रष्टाचार जूसां मेपिंसं उजुरी हे तये मदयेका बीगु थेंज्याःगु ज्याखँत नं झीथाय् जुयाच्वंगु दु। उकिं अथे याइपिंत समेत कारवाही यायेगु धकाः न्ह्याकूगु थ्व पलाखं देशय् कानुनी राज पलिस्था यायेत तःधंगु तिबः बीगु भलसा कायेफु। अख्तियार दुने हे उकथंया आन्तरिक छानबिन ज्या न्ह्याकू थें आः संसदया सार्वजनिक लेखा समिति दुने नं सभासद्तय्सं अनियमित ज्या यानाच्वंगु बारे छानबिन यायेमाःगु खनेदु। संसद देय्या सर्वोच्च निकाय खः तर अन दुने निर्वाचित जुया वइपिं सांसदतय्सं लेखा समिति थेंज्याःगु शक्तिशाली निकाय दुने च्वनाः अनियमित ज्या यानाच्वंगु खँ नं चर्चाय् वयाच्वंगु दु। यदि थज्याःगु निकायत थः हे शुद्ध जुयाच्वन धाःसा जक थुकिं याइगु कारवाहीयात जनतां पत्याः याये फइ ।

More Stories Like this