हिमानीयात छाय् न्ह्यःने हल?
नेपालय् 'बेबी किंग' हयेत भारत अग्रसर
येँ (सन्ध्या टाइम्स)/गबलें धार्मिक ज्याझ्वलय्सा गबलें सामाजिक ज्याझ्वलय् थौंकन्हय् पुलांम्ह युवराज्ञी हिमानी शाहयात न्ह्यःने तयाः 'हाइलाइट' यानाच्वंगुया लिउने नं भारतया 'ग्राय्ण्ड डिजायन' सुलाच्वंगु दावी विज्ञ सूत्रं याःगु दु। खास यानाः नेपालय् 'बेबी किङ्ग' या रुपय् हानं राजतन्त्र लित हयेगु ग्वसाः कथं थौंकन्हय् हिमानी शाहयात एनजीओ चायेकाः न्ह्यःने हयाच्वंगु खँ उगु सूत्रं धाःगु दु ।
नेपालय् राजतन्त्र मदयेधुंकाः वामपन्थीत तसकं बल्लाना वःगु वाःचायेकाः भारतं नेपालय् हानं राजतन्त्र पुनर्वहाली यायेगु सोच दयेकाच्वंगु दावी नं सूत्रया दु। तर आः पुलांम्ह हे जुजु ज्ञानेन्द्र शाह वा वय्कःया काय पारस शाहयात जुजु दयेकेबलय् जनतां स्वीकार याइगु सम्भावना मदुगुलिं छय्म्ह भाजु ह्दयेन्द्रयात 'बेबी किङ्ग' दयेकाः पलिस्था यायेत स्वयाच्वंगु दु। उगु इलय् 'मचाम्ह जुजु'या अख्तियारी धाःसा वया मांम्ह मय्जु हिमानीयात बियाः ज्या याकेगु सोच भारतं तयाच्वंगु खँ नं सूत्रं धाःगु दु ।
नेपाःया इतिहासय् न्हापा न्हापा नं जुजु यदि मचा हे जुयाच्वन धाःसा मांम्हेसित अख्तियारी बियाः मचाम्ह जुजुयात गद्दीइ फ्यतुकेगु चलन दु। नेपालय् मय्जु हिमानीया छबी बांलाःगु कारणं ज्ञानेन्द्र शाहया पूरा परिवार हे अलग्ग च्वनाः हिमानीयात अख्तियारी बिल धाःसा जनतां नं स्वीकार याइगु सम्भावना खंकाः भारतं आः उगु कथंया हे पलाः छीगु तयारी यानाच्वंगु खँ नं सूत्रं धाःगु दु ।
मय्जु हिमानी शाहया थःछेँ नं भारतय् हे खः। उकिं थः 'म्ह्याय्मचा' यात लानि दयेकाः नेपालय् बेबी किङ्ग पलिस्था याःसां भारतयात खास हे खतरा मवइगु विश्लेषण नं भारतं यानाच्वंगु खँ सूत्रं धाःगु दु ।
नेपालय् राजतन्त्र मदयेवं वाम शक्ति तसकं अप्वया वःगु व वहे कारणं भारतय् माओवादीत सक्रिय जुया वःगु धइगु तायेकाः भारतं थ्व न्हूगु पलाः छीत्यंगु खँ नं सूत्रं धाःगु दु। उकिं हिमानीया नामं चायेकातःगु हिमानी ट्रष्टयात आर्थिक ग्वाहालि चूलाकेगु ज्याय् नं भारतया अप्रत्यक्ष ल्हाः दुगु खँ धाःगु दु। पुलांम्ह जुजु ज्ञानेन्द्र शाहया थौंकन्हय् जुयाच्वंगु भारत भ्रमणयात नं सूत्रं थ्वहे ग्वसाःलिसे स्वानाः स्वःगु दु ।
