लिबियाय् अमेरिकाया पूर्वाग्रही आक्रमण

अमेरिका लगायतया पश्चिमी देय्त जानाः लिबियाय् आक्रमण शुरु याःगु दु। लिबियाली जनतां यानाच्वंगु आन्दोलनय् सरकार प्रमुख कर्णेल गद्दाफीं सेना प्रयोग यानाः दमन याःगु त्वहचिनाः अमेरिका लगायतया पश्चिमी देतय्सं लिबियाय् आक्रमण शुरु याःगु खः। सम्भवतः उमिसं लिबियाय् नं इराकय् थें तःधंगु आक्रमण यानाः राष्ट्रपति कर्णेल गद्दाफीयात सद्दाम हुसेन दयेकेगु कुतः याइ जुइ। अमेरिका, बेलायत, फ्रान्सया नेतृत्वय् थ्व आक्रमण जूगु खः। थुपिं देशतय्सं लिबियायात ताक यानाच्वंगु आः मखु। कर्णेल गद्दाफी अमेरिका लगायत पश्चिमी देय्तय् कडा आलोचक कथं म्हसिउ। गद्दाफीयात सत्ताच्युत यायेगु वा हत्या हे यायेगु तकया कुतः अमेरिकां तःक्वः हे यायेधुंकूगु दु। तरमफु। आः स्वय्म गद्दाफीया देशय् हे जनतां आन्दोलन यानाच्वंगु इलय् लाकाः अमेरिकाया नेतृत्वय् थ्व आक्रमण जूगु दु। थौंकन्हय् लिबियाय् जुयाच्वंगु आन्दोलन अनया आन्तरिक मामिला खः। अन हस्तक्षेप यायेगु अधिकार अमेरिका लगायत सुं नं बाह्य देय्यात मदु। यदि अथे हे खःसा अमेरिकां बहराइनया आन्दोलन दबे यायेत सेना छ्वःगु देय् साउदी अरबय् छाय् आक्रमण मयात? लिबियाय् अमेरिकां याःगु थ्व आक्रमणं इरान व चीनयात नापं सशंकित याना बीगु निश्चित दु गुकिं यानाः थ्व निगू देशं आः अमेरिकालिसे समेत ल्वायेगु क्षमता विकास यायेत सैन्य शक्ति अप्वयेकीगु सम्भावना दु। पश्चिमा देय्तय् थज्याःगु ग्वसाःयात थुइकाः राष्ट्रपति गद्दाफीं थः जनतायात सैन्य दमन यायेगु त्वःताः संवाद न्ह्याकेमाःगु आवश्यकता दु। विदेशीया न्ह्यःने पुलिं चुइगु पलेसा थःहे जनताया न्ह्यःने पुलिं चुइगु बांलाः ।

More Stories Like this