येँय् गिरिजाया झ्वाता मतयेकल

झ्वाता तःवःपिं नाप अप्पां कयेकाः ल्वापु

येँ (सन्ध्या टाइम्स)/पुलांम्ह प्रधानमन्त्री नापं नेपाली कांग्रेसया नेता गिरिजा प्रसाद कोइराला मदुगु दछि क्यंगु अवसर लाकाः येँया महाराजगंजस्थित शंखपार्कय् वय्कःया झ्वाता तयेगु ग्वसाःयात स्थानीय जनतां विफल याना बिउगु दु ।

शंखपार्कय् झ्वाताया शिलान्यास यायेत थौं सुथय् न्ह्याकूगु ज्याझ्वलय् ल्वापु जुयाः आयोजक व स्थानीय जनताया दथुइ अप्पां समेत कयेकेगु ज्या जुल ।

उगु पार्कय् नेता कोइरालाया झ्वाता तयेगु कुतः यायेवं उघिमय् हे स्थानीयवासीतय्सं शंखपार्कया नां हिलाः गिरिजाप्रसाद कोइराला शान्ति पार्क नां तये दइ मखु धकाः विरोध प्रदर्शन याःगु खः। अबलय् ग्वसाः खलः व स्थानीयवासी दथुइ ल्वापु जूगु खःसा ल्वापु पनेत प्रहरीं हे हस्तक्षेप यायेमाःगु खः। लिपा प्रहरीया रोहवरय् वार्ता यासें अन कोइरालाया झ्वाता मतयेगु अले श्रद्धाञ्जली सभा जक याना वनेगु धकाः सहमति जूगु खः। झ्वाताया शिलान्यास यायेत थ्यंकः वःम्ह सभामुख सुभासचन्द्र नेम्वाङ नं श्रद्धाञ्जली जक प्वंकाः लिहां झाःगु खः। स्थानीयवासीं हे जग्गा बियाः दयेकातःगु उगु पार्कयात पार्टी विशेषया पार्क याये दइ मखु धकाः स्थानीय मनूतयसं विरोध याःगु खः। झ्वाताया शिलान्यास यायेत अन म्हिगः गाः समेत म्हुइधुंकूगु खः ।

थौं कोइरालाया दकिला
पुलांम्ह प्रधानमन्त्री नापं कांग्रेसया सभापति गिरिजाप्रसाद कोइरालाया थौं दकिला। वय्कः मदुगु थनिं दछि क्यन। कोइराला नेपाःया इतिहासय् आः तक दकलय् अप्वः प्रधानमन्त्री जुयादीम्ह व्यक्तित्व खः। वय्कःया लुमंतिइ थौं कांग्रेसं देयन्यंकंया जिल्लाय् थःथःगु कथंया ज्याझ्वः याइगु जूगु दु। थ्वहे झ्वलय् थौं बहनी पशुपतिइ आरती बीगु ज्याझ्वः नं तयातःगु दु। गिरिजाप्रसाद कोइराला वंगु दँया चैत्र ७ गते ८७ दँय् मदुगु खः। वय्कःया छम्ह जक म्ह्याय् सुजाता कोइराला खः। सुजाता नं नेपाली कांग्रेसया नेता खःसा तःक्वःमछि मन्त्री जुयादीधुंकूगु दु ।