विदेशी राजदूत व कुटनीतिक मर्यादा

जःलाखःला देय् भारतं छ्वया हइम्ह राजदूत व मेपिं नेता एवं सरकारी पदाधिकारीतय्सं नेपाःया वहालवाला मन्त्री प्रधानमन्त्री नापलाइबलय् तयेमाःगु कुटनीतिक शिष्टाचारया पालना मजूगु खँ इलय् ब्यलय् चर्चाय् वयेगु याः। नेपाःया निंतिं भारतीय राजदूत राकेश सुदं छक्वः चप्पल न्ह्यानाः तत्कालिन प्रधानमन्त्री माधव नेपालयात नापलाःगु घटना तसकं चर्चित जूगु खः। थज्याःगु घटना लिपा लिपा मजुइमा धकाः आवंलि परराष्ट्र मन्त्रालयया उजं कयाः जक प्रधानमन्त्री नापलायेगु व्यवस्था यानाच्वँच्वं हे राजदूत सुदं हानं वहे अमर्यादित कथं प्रधानमन्त्री झलनाथ खनालयात नापलाःगु समाचार वःगु दु। वय्कलं थः पिहां वनेमाःगु धइगु त्वहः तयाः प्रधानमन्त्रीया ई कथं मखु, थःगु ई कथं प्रमयात नापलायेगु ज्या याःगु खः। निगू देय्या स्वापू बांलाकेगु ताः तयाः कर्पिनि देशय् दूत जुयाः वयाच्वंम्ह मनुखं थः च्वनाच्वंगु देशया गुगुं नं ऐन कानूनया सम्मान मयायेगु खःसा वयात उगु देशय् च्वनेगु अधिकार दइ मखु। थ्व खँ राजदूत सुदं मसिउगु खइ मखु। वय्कःया बारे थज्याःगु हे जक अप्वः नकारात्मक टिप्पणी वयाच्वंगुलिं वय्कः उकियात सुधार यायेगुपाखे लगे जूसा बांलाइगु खः ।

लिसें मेगु खँ, विदेशी राजदूततय्सं अज्याःगु ज्या यात धायेवं नेपालं उकियात थाय् बी मजिउ। थःत लाःगु इलय् वयाः सुं नं राजदूतं नापलायेगु कुतः यात धायेवं नेपाःया प्रधानमन्त्री, मन्त्रीतय्सं नापलाये मजिउ। कुटनीतिक मर्यादा स्यंकेगु ज्यायात सम्बन्धित देशं नं प्रोत्साहन बी मजिउ। उकिया छगू दोषी पक्ष झी नं जुयाच्वंगु दु। उकियात सुधार यायेगु ज्या झीसं नं यायेमाः ।

More Stories Like this