जःलाखःला देय्तय्सं क्यना हःगु सक्रियता

न्हूगु संविधान दयेकेगु ज्याय् अलमल वयाच्वंगुया नापनापं जःलाखःला देय् चीन व भारतया चलखेल नं अप्वया वःगु संकेत वःगु दु। भारतं मधेसवादी दलया नेतातय्त सःताः मन्त्र स्यनाहः थें चीनं नं माओवादी नेतातय्त सःताः मन्त्र बिया हःगु खनेदु। न्हूगु संविधान मवल धाःसा देशय् छु जुइ धकाः आः तक देश दुनेया जिम्मेवार राजनीतिक दल व उकिया नेतातय्सं चिउताः तःगु मदुनि तर देशं पिनेया शक्तितय्सं धाःसा थ्व बारे माक्व स्वयां अप्वः ध्यान तयाः उगु ईयात प्रभावित यासें थःगु पक्षय् हयेगु कासा समेत शुरु याना हयेधुंकूगु दु। अझ तसकं विडम्बनाया खँ ला छु धायेबलय् जःलाखःला देय्तय् थज्याःगु ज्या आः खुल्लमखुल्ला हे जुया वःगु दु। थःपिनि स्वार्थ पूवंकेत उमिसं नेपाःया स्वाधीनता व स्वतन्त्र अस्तित्वयात हे नकारे याःगु जकं खः लाकि धइगु आशंका समेत आः याये मायेका बिउगु दु। शक्तिशाली देय्तय्सं फुसा कमजोर देय्तय्त थःगु पालि क्वय् तयेत स्वइगु अस्वाभाविक नं मखु। तर उमिगु अज्याःगु पहःयात शिरोधार्य यानाः लय्ताइपिं नेपाःया नेतात हे थौं झीगु लागिं अभिषाप जुयाच्वंगु दु। थःगु सत्ता टिके यायेगु लागिं विदेशीतय् न्ह्यागु खँ नं माने यायेगु नेतातय् प्रवृत्तिं हे थौं नेपाः स्वतन्त्र मुलुक खयां नं कर्पिनि दास जुयाः म्वायेत अभिशप्त जुयाच्वंगु खः। जःलाखःला देय्तय्सं क्यना हःगु थ्व सक्रियतां कन्हय् छुं जुयाः इलय् संविधान जारी याये मफुत व उकियात कयाः छुं बांमलाःगु घटना जुल धाःसा उगु इलय् निर्णायक भूमिका म्हितेगु ज्या नेपाःमिं याये खनी मखु, विदेशीं याइ धइगु खँया स्पष्ट संकेत बियाच्वंगु दु। उगु ई नेपाली राष्ट्रियताया दकलय् खायूगु घडी जुइगु निश्चित खः ।

More Stories Like this