विकिरण नेपालय् नं वयेफु
जापानया परमाणु भट्टी विस्फोटनया लिच्वः
येँ (सन्ध्या टाइम्स)/जापानय् वःगु सुनामी व तःभुखाय् लिपा आः अनया फुकुसिमाय् च्वंगु परमाणु भट्टी विस्फोटनया लिच्वलं मेगु आतंक ब्वलंगु दु। परमाणु भट्टी विस्फोटनं सर्गतय् न्यनावंगु विकिरणं एशियाय् गज्याःगु लिच्वः लाकी धकाः चर्चा जुयाच्वंगु इलय् नेपाः थ्वपाखें मुक्त जुइ फइ वा मफइ धइगु खँय् नं बिचाः शुरु जूगु दु ।
नांजाःम्ह मौसमविद् मणिरत्न शाक्यं 'सन्ध्या टाइम्स'यात कनादी कथं नेपालय् फय् वइगु ट्रेण्ड पश्चिमं पूर्वपाखे वनीगु जूगुलिं आः थथें थुकिया लिच्वः लाइगु खने मदु। तर जुन जुलाईपाखे मनसुन शुरु जुइवं बंगालया खाडी जुयाः फय् हानं पश्चिम दिशां पूर्वपाखे नं वइगु जूगुलिं अबलय् धाःसा लिच्वः लाइगु सम्भावना जुइफु ।
विकिरणया लिच्वः धइगु दँदँ तकं कायम जुयाच्वनीगु कारणं थ्व लिच्वः थुगुसी मवल धायेवं तुं ढुक्क हे जुइ मफइगु खँ नं वय्कलं कनादिल। सर्गतय् वनाच्वंगु विकिरण वर्षा जुयाः पूवंक कुहां मवःतले थुकिया खतरा म्हो मजुइगु खँ नं वय्कलं कनादिल ।
सतर्क जुयाच्वंसा बांलाः
परमाणु विकिरणया लिच्वः नेपालय् आः तक खने मदुनि। अथे खःसां थ्वपाखें सतर्क जुइगु उपाय बारे धाःसा थन थीथी मनूतय् दथुइ एसएमएन यानाः जानकारी बीगु ज्या जुयाच्वंगु दु। अज्याःगु एसएमएनय् धयातः कथं छुं जुयाः आः वा वल धाःसा वपाखें बचे जुयाः म्होतिं नं २४ घौ क्वथाय् हे च्वंच्वनेगु, विकिरणं दकलय् न्हापां हे कथुया थाइराइडयात प्रभावित याइगु जूगुलिं कथुइ बेटाडिन बुलाः च्वनेगु ।
मौसमविद् मणिरत्न शाक्यं कनादी कथं भारतय् थज्याःगु सन्देश बीगु ज्या अनया वैज्ञानिकतय्सं हे बियाच्वंगु दु। उकिं थुलि सतर्कता नालाः च्वंसा उकिं फाइदा हे जुइ। विकिरणं प्रभावित जुइवं दकलय् न्हापां मस्तय्त लिच्वः लाकी। थुकिं तुरुन्त हे क्यान्सर याना बीगु कारणं थ्व तसकं खतरनाक दु ।
