राज्य पुनर्संरचना आयोग छु यायेत?

राज्य पुनर्संरचना सम्बन्धी ज्या यायेगु लागिं राज्य पुनर्संरचना आयोग गठन यायेमाः वा म्वाः धइगु खँयात कयाः विवाद पिहां वःगु दु। संविधान दयेकाः जारी यायेत निलात्या ति हे जक ई ल्यं दनिगु इलय् वयाः वर्तमान ईया दकलय् महत्वपूर्ण विषय जुयाच्वंगु राज्य पुनर्संरचना गय् यानाः यायेगु धइगु खँय् छुं निर्णय तकं याये मफुगु विडम्बनाया खँ खः। खतुं राज्य पुनर्संरचनाया ज्या आयोग हे गठन यानाः यायेगु धइगु खँ अन्तरिम संविधानय् हे उल्लेख जुयाच्वंगु दु। तर राजनीतिक दलतय्सं ई दत्तले उकी गबलें हे चिउताः मतः। जब संविधानसभाया राज्य पुनर्संरचना समितिं थःपिंसं हे थ्व सम्बन्धी प्रतिवेदन तयार यात, अले उकियात अस्वीकार यासें आयोग हे दयेकाः निर्णय यायेमाः धकाः दवाव बियाच्वंगु दु। थ्व विवादं यानाः संविधानसभाय् हानं छक्वः मधेसी व पहाडीया ध्वः बांमलाक हे खने दया बिउगु दु ।

संविधानसभायात छधी यानाः संविधान च्वयेगु ज्या न्ह्याकेमाःगु इलय् अःखः विभाजन यायेगु ज्या जूगुलिं थुकिं अन्ततः संविधान च्वज्यायात प्रभावित याइगु निश्चित दु। थ्व इलय् आयोग दयेकेगु धइगु स्वतः हे इलय् संविधान जारी मयायेगु खः। उकिं उमिसं राज्य पुनर्संरचना आयोग गठन यायेगु धाःगु वास्तवय् राज्य पुनर्संरचना यायेत मखु, संविधान च्वयेगु ज्यायात अलमल यायेत जक खः। यदि थुकी उपिं धाथें गम्भीर खःसा शुरुइ हे थ्व ज्या यायेमाःगु खः। खतुं संविधानसभाया राज्य पुनर्संरचना समितिं तयार याःगु प्रतिवेदन नं पूर्ण मजूनि। आः बरु उकियात संशोधन यायेगुपाखे सकस्यां ध्यान वंसा चित्त बुझे जुइक राज्य पुनर्संरचना जुयाः संविधान च्वज्याय् ग्वाहालि जू वनी ।

More Stories Like this