संसदय् तराई व पहाडी छुटे जुल
राज्य पुनर्संरचना आयोग गठनय् तसकं मतभेद
येँ (सन्ध्या टाइम्स)/अन्ततः संविधान च्वयेगु ज्याय् दकलय् विवादय् लानाच्वंगु राज्य पुनर्संरचना सम्बन्धी प्रतिवेदनयात संवैधानिक समितिइ छ्वयेगु निर्णय जूगु दु। थ्व विवादयात ज्यंका छ्वयेगु लागिं म्हिगः च्वंगु २८ दलया बैठकं थ्व निर्णय याःगु खः ।
आः संवैधानिक समितिइ थ्व विषय प्रवेश जुइवं समिति अन्तर्गतया अध्ययन समितिं थुकिया अध्ययन यानाः वहसया लागिं थीथी न्ह्यसःत पिकाइ। राज्य पुनर्संरचना समितिया दुजःतय्सं धाः कथं थुकी अझ मेगु ८० गू ति न्ह्यसः पिहां वइगु सम्भावना दु। थ्व न्ह्यसःया लिसः लुइधुंकाः तिनि थुकियात पास यायेगु ज्या जुइ ।
तर अज्याःगु न्ह्यसःया लिसः बीगु ज्या संविधानसभाया समितिपाखें हे यायेगु खः लाकि बिस्कं आयोग गठन यायेमाः धइगु खँय् धाःसा राजनीतिक दलतय् दथुइ तीव्र विवाद जूगु दु ।
म्हिगः च्वंगु बैठकय् नं राज्य पुनर्संरचना आयोग गठन यायेमाः वा म्वाः धइगु खँयात कयाः दलतय् दथुइ तःधंक विवाद जूगु खः। मधेसवादी फुक्क हे दलतय्सं छप्वाःम्हुतुं हे आयोग गठन यायेमाःगु आवश्यकता हे मदु धकाः सः तःगु खःसा नेपाली कांग्रेसं आयोग गठन हे यायेमाः धकाः सः तःगु खः। उकी चित्रबहादुर केसीया राष्ट्रिय मोर्चां नं आयोग हे गठन यायेमाः धकाः बः बिउगु खःसा उकी तुं हल्का रुपं नेमकिपां नं साथ बिउगु खः ।
उखे मधेसवादी दलतय्त माओवादीं साथ बिल। माओवादीं आः ई मगायेधुंकूगु कारणं आयोग गठन यायेम्वाःगु बिचाः न्ह्यःने हःगु खः। मधेसवादी दलतय्सं यदि आयोग गठन हे यायेमाःगु खःसा आः तक छाय् सुम्क च्वंच्वनागु धकाः न्ह्यसः तःगु खः ।
म्हिगः जूगु विवादय् आयोग गठन यायेमाः धाइपिं अप्वः यानाः पहाडी सभासद् व यायेम्वाः धाइपिं अप्वः यानाः मधेसवादी दलत जूगु खः। उकी संघीयता पक्षधर चीधंगु दलतय्सं नं आयोग गठन यायेम्वाः धइगु पक्षय् हे बिचाः प्वंकूगु खः ।
नेपाली कांग्रेसया छम्ह सभासदं अन्तरिम संविधानय् 'संघीय' धइगु खँग्वः हे मधेस आन्दोलनं तिनि तःगु कारणं धाथें संघीयताय् वनेगु खः लाकि मखु धकाः निर्णय यायेत आयोग हे माः धकाः बः बिउगु खः। थ्व विवाद धाःसा आः ताःहाकः जुइगु अनुमानु दु ।
