जुजुया छ्यों दुगु नोट बन्द
येँ (सन्ध्या टाइम्स)/नेपाल राष्ट्र बैंकं थनिंनिसें जुजुया छ्यों दुगु नोटया छ्यलाबुला बन्द याःगु दु। राष्ट्र बैंकं थनिंनिसें अज्याःगु नोट काये मखु धाःसां गुलिखे बैंक व फाइनान्स कम्पनीतय्सं धाःसा म्हिगः हे नोट कायेगु बन्द याना बिल। गुकिं यानाः आपालं मनूतय्त धाःसा सास्ती जूगु दु ।
म्हिगः स्वनिगः दुने सिबें नं पिने जिल्लाय् धाःसा जुजुया छ्यों दुगु नोट हिउ वःपिं मनूतय्सं यानाः फुक्क धइथें बैंकय् भिड जुल।गुलिखे बैंकय् थ्वहे खँयात कयाः ग्राहकलिसे ल्वापु तकं जूगु खबर दु ।
उखे राष्ट्र बैंकं धाःसा थःके दुगु नोट थौं हे हिलेमाः धइगु मदु धाःगु दु। थनिंनिसें थज्याःगु नोट चलनचल्तीइ जक हये मजिउ धयागु खः धासें राष्ट्र बैंकया प्रवक्ता भाष्कर मणि ज्ञवालीं राष्ट्र बैंकं तोके याना तःगु थीथी बैंकय् थ्व नोट न्ह्याबलय् हिउसां जिउ धयादीगु दु ।
यदि माल धाःसा नोट हिलेगु थाय् अझ अप्वयेके फइ धासें वय्कलं पिने लानाच्वंगु थ्व फुक्क नोट दुहां मवःतले राष्ट्र बैंकं ध्यबा दुकायेगु ज्या याना हे च्वनी धाःगु दु ।
तर राष्ट्र बैंकं अज्याःगु नोट चलनचल्तीइ हये मजिउ धायेधुंकूगु कारणं सुनां नं सामान न्याये मी यायेबलय् उकिया प्रयोग धाःसा याये मजिउ धयादीगु दु ।
अथे खःसां बजारय् अज्याःगु नोटया प्रचलन तुरुन्त हटे जुया वनीगु सम्भावना धाःसा मदुगु खँ विज्ञतय्सं धाःगु दु।
थौंकन्हय् बजारय् १० अर्ब तका बराबरया जुजुया छ्यों दुगु नोट पिने लानाच्वंगु दु ।
जुजुया छ्यों दुगु नोट आः चले जुइ मखु धाःगुलिं मनूतय्सं छेँय् सुचुका तःगु ध्यबा नापं हिउ वइगु जुयाः देशय् जुयाच्वंगु ध्यबाया अभावयात छुं भचा जूसां म्हो याना बीगु आशा यानातःगु दु ।
नोट हिले दइगु बैंक
छिके जुजुया छ्यों दुगु नोट दुसा क्वय् बियागु बैंकय् वनाः हिले जिउ:
१) नेपाल बैंक लिमिटेड,
२) राष्ट्रिय वाणिज्य बैंक,
३) ग्लोबल बैंक,
४) नेपाल बंगलादेश बैंक,
५) एभरेष्ट बैंक।
