प्रहरी, नेतात व जेलय् जूगु गोली काण्ड

राजधानीया नुगःचु थेंज्याःगु थासय् धस्वाकातःगु केन्द्रीय कारागारय् छुं न्हि न्ह्यः छम्ह भारतीय नागरिकं पेस्तोलं छम्ह कैदीयात कयेकूगु घटनायात कयाः सरकारपाखें यानाच्वंगु छानबिन आः तक गनं हे मथ्यंनि। बरु अःखतं सरकारयात थज्याःगु ज्या मयायेत व उगु काण्डय् ज्वंम्ह अपराधीयात समेत त्वःतेत दवाव वइगु खः ला धइगु ग्याःचिकु ब्वलनाच्वंगु दु। वंगु छुं ई न्ह्यवंनिसें जेलय् कुनातःपिं अपराधीतय्सं पिने खुल्ला रुपं यानाच्वंगु थीथी कथंया आपराधिक घटनायात कयाः लगातार पिहां वयाच्वंगु समाचारं नेपाःया जेल व प्रहरी प्रशासनयात कुगाक्क हे नांगां याना बीधुंकूगु दु। समाचारय् पिहां वःथें जेल प्रशासन गुकथं निकम्मा जुयाच्वंगु खः, उगु अवस्थाय् जेल दुने हे दुहां वनाः कैदीयात गोलीं कयेकेगु ला वास्तवय् सामान्य घटना धाःसां जिउ। जेल प्रशासन गुलि भज्यंक स्यनेधुंकल धइगु खँ नेपाःया सरकार व राजनीतिक पार्टीया नेतातय्सं थज्याःगु दुर्घटना जुइधुंकाः जक सीकीगु धइगु हद दर्जाया गैर जिम्मेवारी खः। सरकार गठन जुइबलय् राजनीतिक दलया नेतातय्सं मन्त्रालय ल्यइ, अन दुने गनं गय् यानाः नये दइ धइगु ल्याखं जक। उगु मन्त्रालयया ज्या व कर्तव्य छु खः धइगु ल्याखं मखु। गृह मन्त्रालय कायेत दलतय्सं याःगु हानथापं प्रस्ट याना बिउगु दु प्रहरी प्रशासन वास्तवय् गुलि राजनीतिक हस्तक्षेपया शिकार जुइ धुंकल धइगु खँ। उकिं जेल दुने जूगु गोली काण्डया दोष मात्र प्रहरीयात जक बियां मगाः। उकिया धाथेंया दोषी
राजनीतिक दल व अन दुने नेतृत्व यानाच्वंपिं लोभीपापी नेतात खः। केवल निम्ह प्यम्ह प्रहरीयात कारवाही यानां थ्व समस्या हल जुइ मखु ।

More Stories Like this