कर्मकाण्ड

नर्मदेश्वर प्रधान

खँयाखँय्
प्रधानमन्त्री हिली। मेम्ह जुइ। अखबार, सञ्चार माध्यमया नियमित कर्मकाण्ड व हे जुइ। झुपडीया तस्बिर छापे याइ। मां। बौ। गुरु। सहपाठीतय् अन्तर्वार्ता प्रस्तुत याइ। न्हूम्ह प्रधानमन्त्रीया बाल्यकालया दयनीय जीवन चर्चाय् हइ ।

न्हूम्ह प्रधानमन्त्री वइ। कन्हय् कुन्हु। अखबारय्। बल्चा। झुपडीया तस्बिर खने दइ। च्वया तइ। झी प्रधानमन्त्री बूगु छेँ। ब्वँमिपिंसं बल्चा खनी। गुलिस्यां धाइ "विचरा"। सहानुभूति क्यनी। मेकुन्हु अखबारय् अन्तर्वार्ता वइ मां बौया। मामं धाइ "जिमि काय प्रधानमन्त्री जुल। जि गद्गद्। लय्ताः। जिं प्वाथय् तयाबलय् सिउ वया भविष्य बांलाः। प्वाथंनिसें व क्रान्तिकारी। विद्रोही। बुइ न्ह्यः प्वाथय् व खूब सनी। तिंतिं न्हुइ। छटपटे जुइ। देश व जनताया चिन्ता। वं गर्भंनिसें काइ।" बौम्हं खँ स्वाइ। जिमि काय थौं देशया सर्वोच्च पदय्। जिं गर्व तायेके। जि मख्ख। जिमि काय मचांनिसें हे। तसक भावुक....। संवेदनशील। निस्वार्थी। कर्पिनि दुःख स्वये मफु वं। व दानी।...बौम्हं प्रधानमन्त्री कायया गुणगान याइ। प्रशंसाया धाः हायेकी ।

मेकुन्हु अखबारय् न्हूम्ह प्रधानमन्त्रीजुं ब्वंगु स्कूलया फोटो वइ। बल्चा। पुलांगु। प्रेसं प्रधानमन्त्रीजुया पुलांम्ह मास्टर नापलाइ। मास्टर। गामय्। साधारण जीवन हनाच्वंम्ह चेला प्रधानमन्त्री जुइ। वं चेलाया विगत लुमंकी। मनमनं धाइ, "मचांनिसें छट्टु व। छन्हु। व तःधंम्ह जुइ तिनि जिं सिउ।" मिडियां वयाके अन्तर्वार्ता काः वइ। प्रमजुया गुरुं धाइ, "जिमि चेला प्रधानमन्त्री जुइ। मचांनिसें व जेहेन्दार, मेहनती, इमान्दार, प्रतिभाशाली, मगजदार, समझदार।" गुरुं भिंगु बांलाःगु विशेषणत ल्यइ। छ्यली ।

छन्हु अखबारय् नवनियुक्त प्रधानमन्त्रीजुया बालसखातय् मन्तव्य पिहां वइ। "न्हूम्ह प्रधानमन्त्री। जिमि बालसखा। लंगौटे यार। व मचांनिसें जिमि नायः। नेता। मार्गदर्शक। जिमि गांया कायमचा। जिमि पासा। थौं प्रधानमन्त्री जुइ। जिमि गांया निंतिं थ्व गौरवया खँ खः।" प्रमजुया पासापिंसं उद्गार प्वंकी ।

न्ह्याम्ह थजु। प्रधानमन्त्री जुइ। कन्हय् कुन्हु अखबारय् झुपडीया किपा खनेदइ। प्रधानमन्त्री जन्मछेँ। व बूगु गांया चर्चा वइ। गांया विकट स्थितिया चित्रण याइ। गरिबीया खँ हइ। मां, बौ, गुरु, पासापिनि अन्तर्वार्ता पिहां वइ ।

फुकसियां म्हुतुं प्रधानमन्त्री बारे वहे खँ वइ। प्रतिभशाली। जेहेनदार। मिहेनती। त्यागी। विद्रोही। क्रान्तिकारी। न्हूम्ह प्रधानमन्त्रीया प्वाथंनिसें ग्वाय् बुया वःगुया चर्चा जुइ।
प्रधानमन्त्री हिली। मेम्ह जुइ। अखबार, सञ्चार माध्यमया नियमित कर्मकाण्ड व हे जुइ। झुपडीया तस्बिर छापे याइ। मां। बौ। गुरु। सहपाठीतय् अन्तर्वार्ता प्रस्तुत याइ। न्हूम्ह प्रधानमन्त्रीया बाल्यकालया दयनीय जीवन चर्चाय् हइ।
नेतात शहरय् च्वनी। आराम काइ। बंगला। चुलुगु पाजेरो गइ। सुख सुविधाय् दुनी। नेतागिरि याइ। छु त्यः। छु मत्यः। चिउताः तइ मखु। न्ह्यागु नं याइ। प्रधानमन्त्री जुइ। शक्तिइ वइ। भाषणय् गांया खँ। ग्रामीण जीवनया विकट अवस्थाया चर्चा। गरिबीया चिन्ता प्वंकी। शहरय् च्वनी। गांया दुःखया भजन हाली। सा जइगु। म्येय् गइगु खँ न्ह्यथनी। गामय् ब्वनागु पाठशालाय् पौ हे मदु। दुःख प्वंकी। विगत जीवनया खँ ल्हाइ। ग्रामीण जीवनया मार्मिक चित्रण याइ। म्हिगः हनागु गांया जीवन। थौं प्रमजुयात राजनीतिक पुँजी जुइ। ख्यले याइ। जनताया सहानुभूति, समर्थन काइ। पाखण्डी खेल। जुक्ति। थौं। प्रत्येक नवनियुक्त प्रधानमन्त्रीतय् कर्मकाण्ड जुइ ।

धाइ। युग हिल। न्हूगु चिन्तनं थाय् काल। वैज्ञानिक सोच खने दत। रुढी सोचया अन्त जुल। म्हिगः पूरोहितवाद, कर्मकाण्डया बोलवाला। पुरोहितवादं अन्धविश्वास ह्वली। पारलौकिक मुक्तिया आकर्षण क्यनी। भ्रम थनी। जनतायात शोषण याइ। प्रगति पनी। पुरोहितवाद। कर्मकाण्ड। त्याज्य। प्यखेरं थुकिया विरोध जुइ। अग्रगमनया पक्षय् मनूत दनी। रुढीवादया विरोध याइ। प्रगतिशील सोच खने दइ। कर्मकाण्डं लिचिली। पुरोहितवाद घातक। विद्रोहया सः थ्वइ। क्रान्तिकारी नारा थ्वइ। जनचेतनाया खँ हइ। परिवर्तनया शंखनाद। प्यखेरं थ्वइ।
तर विडम्बना। थौं। देशय् राजनीतिं पुरोहितवाद हावी जुइ। नेतात कर्मकाण्डय् फँसे जुइ। पुरोहित म्हिगः दिव्यासनय् च्वनी। प्रवचन याइ। त्यागया खँ ल्हाइ। अलौकिक सुखया लोभ क्यनी। दुःखं मुक्तिया खँ हइ। मनूतय्त कर्मकाण्डय् फँसे याइ। थःगु स्वार्थ सिद्ध याइ। ठीक। थौं नेतात जनताया मुक्तिया खँ ल्हाइ। विकासया खँ हइ। राहतया आश्वासन बी। शोषण मुक्तिया विश्वास थनी। कर्मकाण्डी भाषण बी ।

म्हिगःया धार्मिक पूरोहित थौंया नेता। वहे मुलु वहे सुका खने दइ। कर्मकाण्डी। प्रवचन। भाषण। इमि जनता ठगे यायेगु थल जुइ। धार्मिक पुरोहितं जनतायात अलौकिक मुक्तिया आशा क्यनी। थौंया राजनैतिक पुरोहिततसें शोषणरहित मुक्तिया लोभ क्यनी। नेतात थौंया पुरोहित जुइ। जनतायात जजमान खंकी। कर्मकाण्ड न्ह्याकी ।

More Stories Like this