'हानिकारक विकिरणया बारे पिहांवःगु हल्ला गलत'

जापानय् परमाणु उर्जा प्लान्ट विष्फोट जुयाः पिहांव:गु हानिकारक विकिरण एसियाली देय् छगूलिं फैले जुइत्यंगु धकाः पिहांवःगु हल्ला मखुगु धकाः पुष्टि जूगु दु ।

थौं नेपाः लगायत एसियाली देशय् सुथंनिसें वःगु इमेल, मोबाइलय् वःगु मेसेज नापं फेसबुकय् तयातःगु स्ट्याटसय् बीबीसी पाखें वःगु सुचं धासें विकिरण फैले जुइत्यंगुलिं सजग जुइत इनाप यानातःगु खः ।

उगु सुचं पिहांवयेवं बीबीसीं सुचं मखुगु धकाः पुष्टि याःगु खः । बीबीसीं एसियाली देय्त विशेष यानाः फिलिपिन्सय् अज्याःगु हल्ला ब्वलंकेगु ज्या मयानाःगु स्पष्ट याःगु दु । उगु सुचंया हुनिं विशेष यानाः फिलिपिन्सय् तनावपूर्ण अवस्था ब्वलंगु खः ।

सुचंलय् थौं सनिलय् उगु हानिकारिक विकिरण फिलिपिन्सय् थ्यनीगु धकाः उल्लेख यानातःगु खः । मखुगु सुचं ब्यापक रुपं प्रचार जुइवं फिलिपिनो विज्ञान तथा प्रविधि साखां थौं हे छगू पत्रकार सम्मेलन यानाः जापानय् उगु विकिरणया मात्रा अप्वयाच्वंगु खःसां थःपिं सुरक्षित जूगु जानकारी ब्यूगु खः ।

थ्वस्वयां न्ह्यः जापानय् थौं हानं मेगू छगू परमाणु उर्जा प्लान्ट विष्फोट जुयाः हानिकारिक विकिरणया मात्रा अप्वःगु खः । विकिरणया मात्रा अप्वयेवं जापानी सरकारं उर्जा प्लान्टया ३० किलोमिटर नापसं लाःगु छेँया मनूतय्त छेँ दुने हे च्वनाच्वनेत कडा निर्देशन जारी याःगु खः ।

More Stories Like this