खुलामञ्चय् सुकुम्बासी अड्डा

येँ (सन्ध्या टाइम्स)/राष्ट्रिय सुकुम्वासी अधिकार मञ्चं कन्हसं निसें झिंन्यान्हु तक राज्यया मूमू अंग सिंहदरवार, मन्त्री क्वाटर, संविधानसभा भवन लगायत थीथी थासय् धर्ना बीगु जूगु दु। थ्व धर्नापाखें सरकार हे ठप्प याना बीगु खँ मञ्चया महासचिव सोमप्रसाद भण्डारीं कनादिल। निदँ न्ह्यः थःपिंलिसे जूगु सहमति सरकारं लागू मयाःगुलिं थथे धर्ना च्वनेत्यनागु खँ मञ्चं धाःगु दु। थुगुसीया धर्नाय् ब्वति कायेत थीथी जिल्लां वयाच्वंपिं मिसा कार्यकर्तात येँया खुला मञ्चय् पाल ग्वयाः च्वनाच्वंगु दु। उकी द्वःछि स्वयां अप्वः मिस्तय्सं ब्वति काइ धाःगु दु। देय्या न्यय्निगू जिल्लाया सुकुम्बासीत धर्ना च्वनेत खुल्लामञ्चय् मुनेधुंकूगु दु। थौं सुथय् तक नं अन मनूत वयेगु क्रम जारी हे तिनि। मिसा अधिकार नापं सुकुम्बासीतय्त भूमि बीमाः धइगु माग यासें धर्ना च्वनेगु खँ उमिसं धाःगु दु ।

राज्यपाखें सुकुम्बासीतय्त यायेमाःगु व्यवहार छुं नं मजूगु व झिंच्यागू लाख ति दुपिं भूमिहीन सुकुम्बासीतय्त जग्गा व छेँ बीमाःगु माग उमिसं यानाच्वंगु दु ।

धर्ना च्वनेत खुल्ला मञ्चय् मुनाच्वंपिं सुकुम्बासीतय्सं नयेगु, च्वनेगु व्यवस्था अन हे यानातःगु दु। उमिसं थःपिंत माःगु जाकि, बजि, तरकारी, ग्याँस व थीथी खाद्य सामग्री नं अन भण्डारण यानाच्वंगु दु। अथेहे अस्थायी रुपं चःबि समेत दयेका तःगु दु। च्वनेत टेण्ट, पाल व सायर हयाः घेराऊ यासें छेँ थें हे दयेकातःगु दु। अन मुक्कं मिस्त दुगुलिं मिजंतय्त धाःसा दुने दुमकायेगु व्यवस्था यानातःगु दु। आपालं ल्यासेपिं नं दुगुलिं उमित मिजंतय्सं विशेष सुरक्षा बियातःगु दु ।