हानं वहे भाः वृद्धि, हानं वहे पुलांगु त्वहः

प्रधानमन्त्री झलनाथ खनालया सरकारं पूर्णता प्राप्त यायेवं हे जनतायात न्हापांगु उपहार कथं पेट्रोल व हवाई इन्धनया भाः थकाःगु दु। इन्धन भाः थकाइबलय् न्ह्याबलें थें थुगुसी नं वहे त्वहःचिंगु दु - आयल निगमया घाटा। नेपाल आयल निगम धइगु छगू थज्याःगु संस्था खः गुकिं फाइदा जूसा कर्मचारीं बोनस नयाः फुकी, घाटा जूसा जनतायात भाः थकयाः पुइकी। जनतां आयल निगमया घाटा पर्केगु बाहेक फाइदाया हिस्सेदार जुइगु अवसर गबलें काये मखं। निगमया भ्रष्ट कर्मचारीतय्सं जनतायात थज्याःगु अवस्थाय् तयातःगु धाथें नं दुर्भाग्यपूर्ण खँ खः ।

आः नं हवाई इन्धनया भाः थकाःगु खनाः दकलय् ला सुर्खेतया उपिं जनता वाताहां जुल जुइमाः गुमिसं हवाई भाडा क्वकाये माल धकाः वंगु छुं न्हि न्ह्यवंनिसें आन्दोलन याना वयाच्वंगु खः। अथे हे लोड शेडिंगं यानाः जेनरेटरपाखें ज्या यानाच्वंपिं सर्वसाधारण जनता नं पेट्रोलया भावय् जूगु वृद्धिं तःधंगु मारय् लाः वनीगु निश्चित दु। लोडशेडिंगं यानाः दँय् छगू अर्ब तकाया पेट्रोल अप्वः झिके याये मालाच्वंगु तथ्यांक नेपाल आयाल निगमयाके दु। अले नेपालं गुलि अप्वः पेट्रोल झिके यात उलि हे अप्वः निगम घाटाय् लाइगु जूगुलिं लोड शेडिंगं निगमयात अझ हे घाटाय् लाका बीगु नं निश्चित दु। उकिं पेट्रोलियम पदार्थया खपट म्हो यानाः निगम बचे यायेगु खःसां नं राज्यं विद्युत उत्पादनय् हे बः बीमाःगु आवश्यकता खनेदत। चिकं आयातय् कर छुट बीगु वा निगमयात निगू प्यंगू अर्बया टनिक नका बीवं जक थ्व समस्या हल जुइ मखु धइगु खँ वंगु दशकौं न्ह्यवंनिसें जुयाच्वंगु मूल्यवृद्धिया थ्व निरन्तरतां पुष्टि मयाः ला?

More Stories Like this