हसनादेवी श्रेष्ठ

अमर सहिद गंगालाल श्रेष्ठया जहान मय्जु हसनादेवी श्रेष्ठ येँया थाय्मरुइ बूम्ह खः। झिंन्यादँ ति दुबलय् हे झिंखुदँ दुम्ह गंगालाल श्रेष्ठलिसे वय्कःया इहिपा जुल। न्हापांम्ह काय रविलाल श्रेष्ठ जन्म जुयाः नं मदये धुंकल। विक्रम संवत १९९७ सालया माघ १५ गते गंगालालयात शोभा भगवतीइ गोलीं कयेकाः स्याःगु इलय् वय्कः झिंगुदँ तिनि दुम्ह खःसा उगु इलय् वय्कःया प्वाथय् निम्हम्ह काय शशिलाल वयाच्वंगु जुयाच्वन। मचाबू व्यथा जुयाच्वंगु ई जुयाः वय्कलं राणा शासकं ज्वनातःम्ह भाःतयात अन्तिम इलय् तकं नापलाः वने मखन। गंगालालं शहादत प्राप्त यायेधुंकाः काय शशिलालयात ब्वलंकेगुली हे वय्कलं थःगु ई छ्यानादिल। आः शशिलालपाखें छय् प्रशान्तलाल व निम्ह छुइपिं दी ।

गंगालालयात स्वायेगु खँ पिहां वःबलय् अबु भक्तलाल श्रेष्ठं काययात बचे यायेत श्री ३ जुद्ध शमशेरथाय् वनाः बिन्ती नं याः वन। तर कलाःम्ह हसनादेवी श्रेष्ठं धाःसा 'अज्याःगु थ्यंकेधुंकूम्ह भाःतयात जिं ज्यानया भीख फ्वने मखु' धकाः राणा समक्ष माफी फ्वनेगु ज्या तकं यानामदी।
विक्रम संवत १९७६ सालय् बूम्ह वय्कः ९२ दँया परिपक्व बैशय् थ्यंकाः मंत। म्हिगः येँया शोभा भगवतीइ वय्कःयात अतिकं सम्मानपुर्वक अन्तिम संस्कार यात। थ्वहे दिपय् गंगालालयात सी उठे याइपिं तकं सुं मदयाः वय्कःया निनिया काय चन्द्रमान श्रेष्ठ व आनन्दराम धाःम्ह मेम्ह छम्ह मनू जानाः तिनि अन्तिम संस्कार यायेमाःगु खः। उगु इलय् राणातय्सं गंगालालया सीम्हय् नेवाः संस्कार कथं ताय् व अबिर तकं तयेके मबिउगु खः ।

More Stories Like this