पेट्रोलियम पदार्थया भाः थकाल
एमाले-माओवादी सरकारया न्हापांगु उपहार
येँ (सन्ध्या टाइम्स)/नेपाल आयल निगमं थनिंनिसें लागू जुइ कथं पेट्रोल व हवाई इन्धनय् भाः थकाःगु दु। निगमया म्हिगः बहनी च्वंगु संचालक समितिया बैठकं थनिंनिसें लागू जुइ कथं थ्व निता इन्धनया भाः थकायेगु निर्णय याःगु खः ।
न्हूगु भाः कथं पेट्रोल प्रति लिटरय् ९ तका व हवाई इन्धनय् १० तका वृद्धि जूगु दु। थ्व स्वयां न्ह्यः पेट्रोल प्रति लिटर ८८ तका खःसा थनिंनिसें लिटरं ९७ तका थ्यंगु दु। हवाई इन्धनय् आन्तरिकया लागिं प्रति लिटर १० तका थकाःगु खःसा अन्तर्राष्ट्रिय हवाई इन्धनय् आः कायम जुयाच्वंगु ९४१ डलर प्रति हजार लिटरया भावय् आः १३० डलर थकयाः १०७५ डलर थ्यंकूगु खः ।
आयल निगमं जा थुइगु ग्याँस, मचिकं व डिजेलय् धाःसा भाः थकाःगु मदु । आयल निगम सूत्रं बिउगु जानकारी कथं पेट्रोलया भाः थकाःसां नं निगमयात प्रति लिटर ९ पैसा घाटा हे जुयाच्वंगु दु। डिजेलय् धाःसा प्रति लिटर १४ तका व २७ पैसा घाटा जुयाच्वंगु दु ।
थ्व न्हूगु भाः तयेधुंकाः नं निगमयात लय् १ अर्ब १४ करोड व ६२ लाख तका घाटा जुया हे च्वंगु खँ निगमया प्रवक्ता मुकुन्द ढुंगेलं कनादीगु दु ।
निगमं भाः थकायेत्यंगु जूगुलिं हे वंगु छुं न्हि न्ह्यवंनिससें बजारय् पेट्रोलियम पदार्थया सहज आपूर्ति मजुयाच्वंगु खः। आः भाः थकाये धुंकाः पेट्रोल डिजेलया सहज आपूर्ति जुइगु आशा याःगु दु। आयल निगमं इलय् हे भुक्तानी मपू धकाः भारतया इण्डियन आयल कम्पनीं नेपाःयात माक्व पेट्रोलियम पदार्थ छ्वया महयेगु ख्याच्वः बियाच्वंगु कारणं नं नेपाल आयल निगम भाः थकायेत बाध्य जुइमाःगु खँ धाःगु दु। आयलं निगमं पेट्रोलियम पदार्थया भाः थकाये म्वाःलेमा धकाः सरकारयात थुकी कर छूट याना बीत प्रस्ताव छ्वया तःगु दुसां सरकारं उकी वास्ता यानाच्वंगु मदुनि। सरकार दुने उकी बिचाः जुयाच्वंगु खँ धाःगु दु ।
