जुजुया किपा दुगु नोट कंसनिसें चलेमजुइगु
कन्हय् तक नोट हिलेत केन्द्रीय बैंकया इनाप
नेपाल राष्ट्र बैंकं मंगलवाः निसें जुजुया किपा दुगु नोटया कारोवार मयायेत बैंक व वित्तीय संस्थायात निर्देशन ब्यूगु दु ।
राष्ट्र बैंकं कात्तिकया न्हापांगु महिनां न्यालाया दुने जुजुया किपा दुगु व भ्वाथगु नोट विस्थापित यायेगु निर्णय याःगु खः । चल्तीइ दुगु नेपाली ध्यबाया सुरक्षाया निंतं पुलांपिं जुजुया किपा दुगु नोट व भ्वाथः जूगु नोट चिकेत्यनागु धासें बैंकं सर्वसाधारणयात कन्हय् तकया दुने थःपिन्त अपूगु बैंक व वित्तीय संस्थाय् नोट हिलेत इनाप याःगु खः ।
बैंकं पुलांपिं जुजुया किपा दुगु नोटया व्यागलं प्याकेट दयेका ह्यांगु स्लिप तया राष्ट्र बैंकय् हिलेत बैंक व वित्तीय संस्थायात निर्देशन ब्यूगु खः ।
स्वक्वः स्वयां अप्वः छ्यःगु नोट बजारय् मछ्वय्गु नीतिकथं थज्या:गु नोट चिकेत्यंगु खः । केन्द्रीय बैंकं चालू दँया कात्तिक तक बजारय् छगु खर्ब न्यय्छगु अर्ब न्हूगु नोट पितब्यूगु खः । व मध्ये पुलांपिं जुजुया किपा दुगु खुइगु अर्ब बराबरया नोट बजारय् पितब्युगु खः ।
