जापानयात जूगु महाविनाशया आघात

नेपाःया छगू अभिन्न मित्र देय् जापानय् वःगु सुनामी व उकिया नापं ब्वःगु तःभुखाचं तःधंगु हे क्षति याना बिउगु समाचार वःगु दु। अन ब्वःगु ८.९ रेक्टर स्केलया उगु भुखाय्यात थुगु शताव्दीया हे दकलय् तःधंगु विनाशया रुपय् व्याख्या याना हःगु दु। भुखाचं खर्बौं तका बराबरया भौतिक नोक्सानी याना बिउगु दुसा द्वलंद्वः मनूतय् ज्यान वंगु अनुमान दु। थ्व महाविनाशं जापानया राष्ट्रिय प्रगतियात हे तःधंगु लिच्वः लाकीगु अनुमान याना हःगु दु गुगु स्वाभाविक खः। निक्वःगु विश्वयुद्धय् परमाणु बमं ध्वस्त जूगु जापानया जनतां थ्व इलय् नं वहे बमपाखें जूगु विनाशयात हे लुमंकाहःगु दयेमाः। थ्व विनाशं मुक्त जुइत जापानं हाकनं मेगु छगू युद्ध त्याकेगु सरह हे अथक मेहनत याये मालीगु खँय् शंका मदु। खतुं कडा परिश्रमया लागिं विश्वय् हे नांजाःपिं जापानी जनतां थ्व विनाशपाखें जूगु भौतिक क्षतियात मेगु दँबदँ लिपा हे पूवंकी जुइ। तर थुकी लानाः मदुपिं मनूतय् थःथिति, घाःपाः जूपिं मनूतय्त जूगु मानसिक आघात क्वलायेकेत धाःसा अझ नं ई काइतिनिगु खँयात नं ल्वःमंके मजिउ। थ्व इलय् जापानयात सम्पूर्ण विश्वं हे थःपिनि सहानुभूति व सहयोगया वर्षा हे यानाः हःपाः बीमाःगु आवश्यकता दु। नेपाःया प्रगतिप्रति न्ह्याबलें नं उदार जुयाः ग्वाहालि यायेत नुगः चायेकीगु देय् जापानय् जूगु थ्व विनाशपाखें नेपाली जनतायात मर्माहत याइगु स्वाभाविक हे खः। जापानया थीथी शहरय् नेपाःया आपालं नागरिकत ज्या यानाच्वंगु दु। उमिगु सुरक्षा नं झीगु लागिं चिउताःया विषय जुइमाः। मेगु मखुसां, जापानयात झीगु दुनुगःया सहानुभूति दु ।

More Stories Like this