पेट्रोलया भाः हाकनं थकाल
नेपाल आयल निगमं प्यलाया दुने पेट्रोलियम पदार्थया निक्वःगु खुसिइ भाः थकायेगु ज्या याःगु दु । अन्तर्राष्ट्रिय बजारय् कच्चा चिकंया भाः थहाँवंगु व निगमया घाटादर बृद्वि जूगु हुनि क्यना निगमं थनिंनिसें लागु जुइगु कथं पेट्रोलय् प्रतिलिटर गुतका व हवाई इन्धनय् म्हिगः निसें लागु जुइगु कथं आन्तरिक पाखे प्रतिलिटर झितका व अन्तर्राष्ट्रिय हवाई इन्धनय् प्रतिहजार लिटरय् सच्छि व स्वीतका अमेरिकी डलर मूल्यबृद्वि याःगु दु ।
न्हूगु भा: कथं थ्वसिवें न्ह्यः चय्च्यातका प्रतिलिटर तूगु पेट्रोलया धाः गुइन्हय्ता थ्यंगु दुसा आन्तरिक हवाई इन्धन प्रतिलिटर गुइतका व अन्तर्राष्ट्रिय हवाई इन्धन पाखे थ्वसिवें न्ह्यः प्रतिहजार लिटर गुसः व पीन्याताय् सछि व स्वीतका डलर अप्वयेका द्वःछि व न्हेन्यातका थ्यंकूगु दु ।
निगमं एलपी ग्यास, डिजेल व मचिकंया भाः धाःसा थकागु मदु । भाः थकया नं अझं पेट्रोलय् प्रतिलिटर गुंगः ध्यवा घाटा जूगु निगमं धाःगु दु । हवाई इन्धनय् धाःसा निगमयात नाफा जूगु दु । इन्डिन आयल कर्पोरेशनया लिपांगु भाः कथं निमगयात आः लय् छगू अर्ब झिंप्यंगू कोटि तका घाटा जुयाच्वंगु दु । निगमयात दकले अप्वः घाटा एलपी ग्यासय् लानाच्वंगु दु ।
सरकारं वंगु मसिरय् निगमयात निक्वः तक अनुदान बिइधुंकूगु दु । थ्वसिवें न्ह्यः नं निगमं वंगु मंसिरय् हवाई इन्धन बाहेकया पेट्रोलियम पदार्थय् भाः थकागु खः ।
