आः संविधानया व्याख्या सर्वोच्चं मखु
नेपालय् नं संवैधानिक अदालतया व्यवस्था
येँ (सन्ध्या टाइम्स)/नेपाःया संविधानया अन्तिम ब्याख्या आः सर्वोच्च अदालतं मयासे संवैधानिक अदालतं याइगु जूगु दु ।
न्हापा सर्वोच्च अदालतं संविधानया अन्तिम ब्याख्या याना वयाच्वंगु खःसा आवंलि अज्याःगु व्याख्या यायेगु अधिकार संवैधानिक अदालतयात बीगु धकाः न्हूगु संविधानय् उल्लेख याकेगु खँय् सहमति जूगु दु ।
न्हूगु संविधान च्वज्याय् वयाच्वंगु विवादत ज्यंकेत संविधानसभा संवैधानिक समिति अन्तर्गत दयेकूगु उपसमितिया थौं सुथय् च्वंगु बैठकं संविधानया अन्तिम ब्याख्या यायेगु अधिकार संवैधानिक अदालतयात बीगु सहमति जूगु दु ।
थौं सुथय् संसद सचिवालय सिंहदवारय् च्वंगु उगु बैठकं न्याम्ह दुजः दुगु संवैधानिक अदालत गठन यायेगु व उकिं हे संविधानसभाया अन्तिम व्याख्या याकेगु सहमति जूगु खँ नेपाली कांग्रेसया नेता नापं उप समितिया दुजः रामचन्द्र पौडेलं धयादीगु दु ।
आः तक संविधानया अन्तिम व्याख्या सर्वोच्च अदालतं याइगु प्रावधान जुया वयाच्वंगु दु। नेपाली कांग्रेस, एमाले नापं मेमेगु दलतय्सं संविधानया अन्तिम व्याख्या सर्वोच्च अदालतं हे यायेमाः धकाः अडान कया वयाच्वंगु खःसा एकीकृत माओवादी नापं मधेसवादी दलतय्सं धाःसा संवैधानिक अदालतं संविधानया व्याख्या याकेमाः धया वयाच्वंगु खः ।
प्रधानन्यायाधीश संयोजक जुइगु संवैधानिक अदालतया ज्या व कार्ययोजना बारे धाःसा मेगु बैठकय् सहलह जुइगु खँ उप समितिया दुजः नापं मधेसी जनअधिकार फोरमया अध्यक्ष उपेन्द्र यादवं कनादीगु दु। उपसमितिया मेगु मुँज्या आइतवाः च्वनी ।
एकीकृत माओवादीया अध्यक्ष प्रचण्डया नेतृत्वय् दयेकूगु उगु उप समितिं लिपांगु इलय् वयाः व्यवस्थापिकाया सवाल लगायत मेमेगु खँय् नं सहमति ब्वलंकेगु यानाहःगु दु। विवादित विषययात ज्यंकगु निंतिं उगु उपसमितियात थ्व हे फागुन महिना तकया म्याद बियातःगु दु ।
मेमेगु सवालय् विवाद ज्यंका वनाच्वंगु जूसां दलतय्सं राज्य पुनर्संरचनाया सवालय् धाःसा आः तक नं सहलह हे ब्याकूगु मदुनि ।
