रुग्ण उद्योगयात ध्वस्त याइगु हडताल

तलब वृद्धिया माग यासें हानं छक्वः माओवादी मजदूरतय्सं देय्न्यंकं आन्दोलन शुरु याःगु दु। उमिसं तलब वृद्धि धइगु खँ न्ह्यःने तःसां नं थ्व वास्तवय् माओवादी मजदूर संगठन दथुइ नकतिनि जूगु कचवंया लिच्वः जक खः धइगु नं आभास दु। विभाजन लिपा थःपिनि संगठन विस्तार यायेगु ताः तयाः उमिसं थज्याःगु आन्दोलन याःगु खनेदु। तर छगू मजदूर संगठनया क्षेत्र विस्तार यायेगु लागिं पूरा देशया हे उद्योग व्यवसाय ध्वस्त जुइकथं ज्या याःगु धाःसा छुं नं कथं पाय्छि मखु। थ्व इलय् देशय् माओवादीया हे समर्थनय् सरकार न्ह्यानाच्वंगु दु। अले माओवादी मजदूरतय्सं हे आन्दोलनया नामय् कलकारखाना बन्द यानाच्वंगु दु। थुकिं माओवादी प्रति जनताय् गज्याःगु सन्देश वनी, थ्व खँय् माओवादी नेतातय्सं बिचाः मयाःगु विडम्बनापूर्ण खँ खः ।

लिसें मजदूरतय्सं तलब बढे या धकाः माग यायेगु थ्व पाय्छि ई खः लाकि मखु थ्व नं बिचाः यायेमाःगु विषय दु। छाय्धाःसां राज्यं लागू यानातःगु १६ घण्टे लोडशेडिंगं यानाः उद्योग व्यवसायं न्हिं बछि तक नं ज्या याये खनाच्वंगु मदु। लोडशेडिंगं यानाः देय्या आपालं कलकारखाना बन्द जुयाच्वंगु दुसा चले जूगु नं गुलि चले जुइगु खः धाये मफुगु अवस्था दु। थज्याःगु इलय् छुं नं त्वहचिनाः हडताल जुइबलय् उकिं कारखानायात पूर्ण रुपं बन्द याना बीगु सिबाय् मेगु ज्या याइ मखु। उकिं थ्व इलय् राज्यं तुरुन्त हे हस्तक्षेप यानाः समस्या ज्यंकेगु ज्या यायेमाः। उद्योग व्यवसायीतय्सं आंशिक रुपं माग पूरा यायेगु खँ न्ह्यःने हःगु दु। उकी सहमति जुइमाःगु खनेदु ।

More Stories Like this