एमालेयात हानं अवसर
तर ताःलाइगु सम्भावना हानं कम
ताः ई लिपा सरकार गठन यायेगु अवसर थःगु ल्हातय् वःसां नं नेकपा एमाले थःगु नेतृत्वय् सरकार दयेकेत ताःलाइगु सम्भावना धाःसा तसकं म्हो जक दुगु खँ थन धयाहःगु दु । राष्ट्रपितं सहमतिया सरकार दयेकि धकाः याःगु आह्वान कथं एमालें न्हूगु सरकार गठनया कुतः याःगु खःसां माओवादी माने मजूगु कारणं उगु कुतः ताः मलात । आः सहमतिया सरकार गठन यायेगु ई हे फुइधुंकूगु कारणं एमालें बहुमतया सरकार गठन यायेमाःगु जूगु दु । अथे खःसां नं एमालें थौं छक्वः हाकनं सहमतिया निंतिं कुतः यायेत्यंगु दु ।
यदि सरकार दयेकेगु ज्या न्ह्यात धाःसा प्रधानमन्त्रीया रुपय् माधव नेपालयात न्ह्यःने तयेगु धकाः पार्टी दुने सहमति जूसां सरकार गठनया ज्या अझं पक्का मजूनिगुलिं एमालें माधवया नां बारे आधिकारिक निर्णय धाःसा अझं मयाःनि ।
उखे पार्टीतय्सं सहमतिया सरकार गठन याये मफुगु कारणं थौं राष्ट्रपितं संविधानया धारा ३८ २ कथं बहुमतया सरकार दयेकि धकाः हानं न्हूगु आह्वान यायेत्यंगु दु । एमालें सरकार गठन यात धाःसा उकियात कांग्रेसं समर्थन यायेगु धाःसां मधेशी जनअधिकार फोरमया समर्थन मदयेकं सरकार दयॆके फइगु अवस्था धाःसा मदु । तर फोरमं मधेश मुद्दालिसे सम्बन्धित आपालं खँय् एमालेलिसे बिचाः मिले मजूगु कारणं एमालेलिसे जानाः सरकार दयेकेत समस्या दुगु खँ धयाहःगु दु । थुकिं यानाः सरकार गठनया ज्या थौं तक नं अन्यौल हे जुयाच्वंगु दनि ।
