हलिंया दकलय् तःमि मनूया धन ३८ प्रतिशतं अप्वल

हलिंया दकलय् तःमि मनू मेक्सिकोया कार्लोस स्लिमया धन थुगुसी ३८ प्रतिशतं अप्वःगु दु । अमेरिकी म्यागजिन फोर्ब्सया कथं टेलिकमया सञ्चालक कार्लोसया धन राशी २०.५ बिलियन डलर अप्वयाः ७४ बिलियन डलर थ्यंगु दु ।

अथेहे न्हापा दकलय् तःमि जुइधुंकूम्ह माइक्रोसफ्ट कम्पनीया संस्थापक बिल गेट्स थुगुसी नं ५६ बिलियन डलर सहित निगूगु थासय् लाःगु दु । उखे भारतया लक्ष्मी मितल ३१.१ बिलियन डलर सहित खुगूगु थासय् ला:गु दुसाः २७ बिलियन डलर सहित भारतया हे मुकेश अम्बानी गुंगूगु थासय् दु ।

फोर्ब्स म्यागजिनया कथं सन् २०१० फेबुअरी निसें सन् २०११ फेबुअरीया दुने २१४ म्ह न्हूपिं बिलेनियर जुइत ताः लाःगु दुसाः १५म्ह धाःसा बिलेनियरया धलखं पिने लाःगु दु । आःया ताजा लिच्वः स्वयेगु खःसा हलिंन्यंक १,२१० म्ह बिलेनियरत दु ।

More Stories Like this