संविधानया विवाद ज्यंके मफुत
उपसमितिं विवादया विषयत मेथाय् पन्छे याना छ्वत
येँ (सन्ध्या टाइम्स)/संविधान च्वयेगु ज्याय् वयाच्वंगु थीथी समस्या चीका वनेगु लागिं थीथी राजनीतिक दलया नेतात तयाः संवैधानिक समिति अन्तर्गत दयेकूगु उपसमितिया म्हिगः च्वंगु बैठकं नं छुं हे समस्या समाधान याये मफुत। सूत्रतय्सं बिउगु जानकारी कथं म्हिगः च्वंगु बैठकं राज्य पुनर्संरचना, चुनाव प्रणाली, शासकीय प्रणाली थेंज्याःगु महत्वपूर्ण विषयय् निर्णय यायेगु जिम्मा सम्बन्धित विषयया मस्यौदा च्वइगु कमिटीतय्त हे बियाछ्वःगु दु ।
उपसमितिं निर्णय मयासे विवादित विषययात मेथाय् पन्छे यायेगु ज्या जक जूगु कारणं संविधान च्वयेगु ज्याय् अझ नं जटिलता वयेफुगु खँ धाःगु दु ।
उगु उपसमितिया संयोजक माओवादी अध्यक्ष प्रचण्ड खःसा म्हिगः संयोजक प्रचण्ड लिसें प्रधानमन्त्री झलनाथ खनाल समेत च्वनाः बैठक याःगु खः। तर बैठकं म्हिगः जक करिब ३० गू विषयया विवाद क्वचायेका धकाः धाःगु दुसां वास्तवय् म्हिगः मुक्कं प्यंगू विषयया विवाद जक क्वचाःगु दावी सूत्रं याःगु दु ।
राज्य पुनर्संरचना आयोगय् विवाद
म्हिगः च्वंगु संवैधानिक समिति मातहतया उपसमितिया बैठकय् नेपाली कांग्रेस व मधेसवादी दलतय् दथुइ धाःसा राज्य पुनर्संरचना आयोग गठन यायेगु खँयात कयाः विवाद जुल। नेपाली कांग्रेसं राज्य पुनर्संरचनाया ज्या यायेगु खःसा आयोग गठन यानाः उकिया सुझाव कायेमाः धकाः सः तलसा मधेसवादी दलतय्सं आयोग गठन यायेमाःगु औचित्य पुष्टि मयाःतले आयोग गठन यायेम्वाः, संविधानसभां हे थुकिया बारे निर्णय यायेमाः धकाः सः तःगु खः ।
उगु विवादय् माओवादीं नं आः आयोग गठन यानाः ज्या यानाच्वनेगु ई मगाःगु कारणं आयोग गठन मयाःसां जिउ धकाः बिचाः तःगु खः। थ्व स्वयां न्ह्यः माओवादी नं आयोग गठन यानाः राज्य पुनर्संरचनाया ज्या यायेत सहमत जुइधुंकूगु खः ।
