यमलोक वनेगु राजमार्ग मजुइमा थ्व सतक

कृष्ण प्रजापति

कोटेश्वरं ख्वपया सूर्यविनायक तक जापानया ग्वाहालिं ६ लैन यानाः लँ तब्याकेवं तीब्र गतिं गाडी चले याइपिं अप्वयाः दुर्घटना नं उलि हे अप्वयावंगु दु। थ्व झ्वलय् सतक प्रयोगय् वसांनिसें आः तक छगू दर्जन मनूया ज्यान वंगु दुसा निगू दर्जनया अंगभंग जूगु दु। सूर्यविनायक-तीनकुनेया लँ आः तक ९० प्रतिशत पूवने धुंकूगु खँ निर्माण आयोजनाया प्रमुख सरोज प्रधानं कनादीगु दु। ९.१ किलोमिटर ताःहाकःगु उगु लँ आः सल्लाघारी-सूर्यविनायक खण्ड हे जक दयेके ल्यंदनि। वंगु महिनाय् राष्ट्रिय प्रजापति समाजया संस्थापक केन्द्रीय दुजः व नेपाल इन्जिनियरिङ कलेजया उपप्रध्यापक मोहनविक्रम प्रजापतियात मोटरसाइकलं ठक्कर नकाः उपचारया झ्वलय् मदयेवं राष्ट्रिय प्रजापति समाज, मध्यपुर थिमि इन्जिनियरिङ समाज, ल्याय्म्ह पुचः थिमि लगायतया संघ संस्थात जानाः सतक दुर्घटना न्युनीकरण यायेगु ताः तयाः विशेष अभियान हे न्ह्याकूगु खः। थ्व झ्वलय् स्थानीय जनतानापं प्रशासनं सहलह यानाः आः न्हियान्हिथं सुथय् बहनी मस्तय्त छ्यलाः सडक दुर्घटनापाखें सचेत यायेत प्रचार अभियान चले जुयाच्वंगु दु ।

स्थानीय जनतां उगु सडक प्रयोगय् वयेवं अप्वःगु दुर्घटना न्युनीकरण यायेत सम्बन्धित निकायया ध्यानाकर्षण यायेगु निंतिं हे थःपिंसं उगु सडक बन्दया अभियान न्ह्याकागु खँ नागरिक समाज थिमिया ज्ञानराम श्रेष्ठं सन्ध्या टाइम्सयात कनादिल। २०६५ साल पुसय् निर्माण ज्या शुरु यानाः निदँया दुने पूवंकेगु धाःसां निदँ फुइधुंकलं नं उगु सडक पूर्ण रुपं दयेकेज्या पूवंगु धाःसा मदुनि। जापान सरकारया ७७ करोड दामं निर्माण ज्या न्ह्याकूगु उगु सतकय् म्हुयातःगु गालय् कुतुं वनाः छम्ह न्हय्दँ दुम्ह मचा नं सीधुंकूगु दु। उलि दुर्घटना जुयाःलि नं मुख्य चोक कौशलटारंनिसें सूर्यविनायक तकया गुगुं नं थासय् चान्हय् च्याकेत मतया ब्यवस्था याःगु मदुनि। ट्राफिक कार्यलयपाखें सतक दुर्घटना न्युनीकरण यायेत विशेष योजना पित हःसां आः तक दुर्घटना धाःसा म्हो यायेफुगु मदु। सतकया थाय्थासय् ३० किलोमिटर प्रतिघण्टाया ल्याखं जक गाडी चले यायेदु धकाः च्वयातःगु साइनबोर्ड तयातःसां लँ तब्यायेधुंकाः ६० निसें ९० किलोमिटर प्रतिघण्टां मोटर मोटरसाइकल चले याना हःगुलिं दुर्घटना अप्वयावःगु खः ।

आः निर्माण सम्पन्न जूगु ४ लैन लँ व मनहरा व हनमन्ते ताँ जापान सरकारं नेपाः सरकारयात वंगु असोज २५ गते हस्तान्तरण याये धुंकूगु दु। तर नेपाः सरकारया जिम्माय् लानाच्वंगु मेगु २ लैन सतक दयेकेगु ज्या धाःसा आः तकं न्ह्याये फुगु मदुनि। हज्मा कम्पनीं ठेक्का काःगु उगु सतक दयेकेगु ज्याय् आपालं नेपाली व जापानी प्राविधिज्ञतय् योगदान दु। थिमि नगरपालिकाया पुलांम्ह मेयर मदनकृष्ण श्रेष्ठं नं फुटपाथ मदुगु व सतक मत मदुगुलिं नं सतक दुर्घटना अप्वःगु खँ कनादिल। २०२८ सालय् चीन सरकारं अरनिको राजमार्ग दयेकूगु इलय् हे मतया व्यवस्था जूगु खः। थन सनिलय् ६ बजेनिसें ११ बजेया इलय् आपाः दुर्घटना जुइगु याः। थ्वँ अय्लाः त्वनाः गाडी चले याइपिं, तीब्र गतिं गाडी ब्वाकीपिं अप्वः दया वयेवं सतक दुर्घटना अप्वःगु खः। वंगु लछि न्ह्यःन तिनि सेनाया गाडीं छम्ह मिसायात ठक्कर नकेवं स्थानीय जनतां सेनाया ट्रक हे च्याका बिउगु खः ।

वयां छुं ई लिपा हे छगः ट्रपरं ठक्कर नकाः छम्ह मनूया तुति हे चायेमाःगु अवस्था जूगु खः। थथे बारम्बार दुर्घटना अप्वया च्वंगु खँयात ध्यानय् तयाः ट्राफिक प्रहरी कार्यालयपाखें विद्यार्थीतय्त ट्राफिक नियम बारे तालिम नं शुरु याःगु दु। महानगरीय ट्राफिक प्रहरी परिसर ख्वपं शुरु याःगु उगु तालिमय् आपालं सहभागी जुयाच्वंगु दु। तालिमय् सहभागी जूपिं आदर्श उमावि, नौलो ज्योति ईंग्लिस स्कूल, सिद्धार्थ विद्यापीठ व शंखधर ईंग्लिस स्कुलया मस्तय्सं अन न्हिंन्हिं अफीस ई जुइवं ट्राफिक नापं थःपिं नं चालकतय्त सचेत यायेगु ज्याय् लगे जुयाच्वंगु दु। यदि ट्राफिक नियम बारे चालक, परिचालक व स्थानीय जनतायात नं बांलाक चेतना बी मफुत धाःसा तबाला जूगु थ्व सतक येँनं ख्वप मखु बरु ख्वपं तप्यंक यमलोक वनेगु अःपुगुराजमार्गय् परिणत जू वनीगु खँय् आपाः शंका याये माली मखु ।

More Stories Like this