राजनीतिं सन्यास कायेगु दलाइ लामाया घोषणा

तिब्बती धार्मिक नेता दलाइ लामां तिब्बती निर्वासित सरकारया प्रमुख पाखें सन्यास कायेगु घोषणा यानादीगु दु ।

सन् १९५९या असफल विद्रोह लिपा तिब्बतपाखें निर्वासित जीवन हनाच्वंम्ह लामां निर्वासित जीवनया न्ययेनिदँ क्यंगु लसताय् भारतया धर्मशालाय् बिहीवाः सुथय् जूगु सभाय् सम्बोधन यानादिसें सन्यास कायेगु खँ धयादीगु ख: । वय्कलं तिब्बती जनतां स्वतन्त्र पूर्वक थः नेता ल्ययेगु ई वःगु धासें सन्यासया घोषणा यानादीगु खः ।

मार्चय् च्वनीगु निर्वासित तिब्बती संसदया मुँज्याय् संविधान संशोधन यानाः थःम्ह सरकारया प्रमुख पदं राजीनामा बीगु घोषणा वय्कलं उगु सभाय् यानादीगु खः । लामां धयादिल, 'आः स्वतन्त्र रुपं नेता ल्ययेगु ई त्यल ।'

सम्बोधनय् लामां थःम्हं तिब्बतयात स्वतन्त्र राष्ट्र घोषणा यायेमाःगु माग मयानागु स्पष्ट यानादिसें तिब्बतयात अर्थपूर्ण स्वायत्तता बीमाःगु धयादिल । वय्कलं चीननाप आर्थिक विकास नापं मानव विकासय् प्रचुर भूमिका म्हितेगु सम्भाव्यता दुगु तर उकिया निंतिं चीनं अन्तरार्ष्ट्रिय सुमदायया विश्वास त्याकेमाःगु बिचाः प्वंकादिल ।

सन् १९५९य् तिब्बतया विद्रोह लिपा धार्मिक नेता लामा भारतय् निर्वासित जीवन हनावयाच्वंगु दु ।

More Stories Like this