राज्यया कारणं बिजोग जूपिं हलियात

नेपाःया सुदूर पश्चिम लागाय् यक्व बुँ दुपिं जमिन्दारतय्सं थःथाय् बुँइ ज्या यायेत हलिया तइगु प्रथा तसकं पुलांगु खः। बुँइ ज्या याइपिं कृषी मजदूरत मध्ये हलियायात दकलय् क्वय्यागु तह कथं काइ। छाय्धाःसां जमिन्दारतय्सं अज्याःपिं हलियातय्त ज्या याःगु वापत ज्याला तकं बी मखु। न्हापा न्हापा बाज्या तापाःबाज्यापिंसं कयातःगु त्यासा पुइकेगु ल्याखं उमित हलिया कथं बुँइ ज्या याकातइगु खः। ज्या यात धकाः उमित ज्याला बी मखु। पुलांगु हे त्यासा कटे जुल धकाः क्यनी। ज्या यानाच्वंत्तले उमित च्वनेगु थाय् बी। अले बुँया उब्जनी हे नयेगु जुइ। थ्व हलियातय् थःगु छेँबुँ धइगु छुं नं दइ मखु। जमिन्दार हे उमिगु लागिं भगवान जुयाच्वनी ।

हलियातय्त थज्याःगु अवस्थापाखें मुक्त यायेमाः धइगु बांलाःगु भावना तयाः सरकारं हलिया मुक्तिया घोषणा ला याना बिल, तर मुक्त जुया वःपिं हलियातय्त गन तयेगु व छु ज्या बीगु धइगु बारे छुं हे योजना मदुगु कारणं मुक्त जूपिं हलियात झन् हे बिजोग अवस्थाय् लानाच्वंगु समाचार पिहां वःगु दु। सरकारं न्हापा कमैया प्रथा खारेज जुल धकाः घोषणा याः थें हलिया प्रथा खारेजया ज्या नं जूवंगु दु। वास्तवय् राज्यं न्ह्याबलें नं हचुवाया भरय् केवल लोकप्रिय जुइत जक छुं नं ज्या याइगु जुयाच्वन धइगु खँ थुकिं प्रस्ट याना बिउगु दु। थथे हे मेमेगु सवालय् नं राज्यया हचुवा ज्यां आपालं जनता पीडित जुइ मालाच्वंगु दु ।

उकिं आः राज्यं थःपिंसं यानागु घोषणायात सार्थक साबित यायेगु खःसा मुक्त जूपिं कमैया व हलियातय् लागिं तुरुन्त हे उचित व्यवस्था याना बीमाःगु आवश्यकता दु ।

More Stories Like this