मन्त्री मदुगुलिं सुरक्षा खतराय्

प्रहरी अधिकृततय्त चलखेल यायेगु सुवर्ण अवसर

येँ (सन्ध्या टाइम्स)/छुं जुयाः थ्व इलय् देशय् शान्ति सुरक्षा खलल जुइ कथंया छुं घटना जुल धाःसा उकियात नियन्त्रणय् जक कायेत नं सुरक्षा निकायत आछु आछु कनीगु सम्भावना दुगु खँ सुरक्षा सम्बन्धी छगू सूत्रं धाःगु दु। अथे जुइफुगुया छता हे जक कारण खः, गृह मन्त्रालय नेतृत्वहीन जुयाच्वंगु ।

फुक्क मन्त्रालय सिबें गृह मन्त्रालयया संवेदनशीलता छु धायेबलय् थ्व २४ हे घण्टा सक्रिय जुयाच्वने माःगु निकाय खः। न्हिंन्हिं हे धइथें देय्न्यंकंया सुरक्षा स्थिति व सम्भावित खतराया बारे ब्रिफिङ्ग यानाच्वनेमाःगु थुकिया नियम दु। तर थौंकन्हय् गृह मन्त्रालयया जिम्मा काइम्ह बिस्कं मन्त्री हे मदुगु कारणं थज्याःगु फुक्क हे ज्या ठप्प जुयाच्वंगु दुसा अज्याःगु छुं बांमलाःगु घटना जुल धाःसा झटपट निर्णय कायेत हे थाकुइगु खँ नं धाःगु दु ।

अथे हे जुइ धकाः गृह मन्त्रालयया लागिं बिस्कं मन्त्रीया व्यवस्था यानातःगु खःसा गृहमन्त्री जुइम्ह मनू तसकं लिमलाक ब्वाँय् जुयाच्वनेमाः। गबलें गबलें चान्हय् हे अतिकं महत्वपूर्ण निर्णय बीमालीगु अवस्था नं वयेफु। गृह स्वइम्ह नं प्रधानमन्त्री हे जुयाच्वन धाःसा प्रहरी अधिकृतय्सं वय्कःयात धायेसातकि नापलाये मफइगु अवस्था जुइफु। उकिं ताः ई तक बिस्कं गृह मन्त्री मतसे च्वंच्वनेगु देय्या शान्ति सुरक्षाया लागिं खतरनाक जुइफुगु खँ नं सुरक्षा सूत्रं धाःगु दु ।

अथे हे मन्त्रालय स्वइम्ह बिस्कं मन्त्री मदुगु थ्व ई प्रहरी व गृह मन्त्रालयया उच्च अधिकारीतय् लागिं धाःसा अवैध ढंगं चलखेल यायेगु सुवर्ण अवसर जुइफुगु खँ नं सूत्रं धाःगु दु। मन्त्रालयया दकलय् प्रमुख मनू मदुगु कारणं उपिं हे प्रमुख सरह जुयाच्वंगु दइ। थ्वहे इलय् उमिसं अपराधी व थःगु हे विभाग दुने सरुवा बढुवा जुइमाःपिं पदाधिकारीतपाखें फाइदा कायेगु ज्या यायेफुगु खँ नं धाःगु दु ।

मन्त्री दत धाःसा याके हे मबीगु ज्या तकं थ्व इलय् प्रहरीया उच्च अधिकारीतय्सं यानाच्वंगु दयेफु धासें सूत्रं अज्याःपिंसं धाःसा बिस्कं मन्त्री मदुसां थःपिंत छुं हे समस्या मदु धकाः ढुक्क यायेत स्वयेफु धाःगु दु। प्रम खनालं थौंकन्हय् गृह मन्त्रालयया 'हालचाल' सामान्य रुपं न्यने धुंकूगु नं दु ।